ՄԱԿ-ի Անվտանգության խորհուրդը չի ընդունել Դամասկոսում ՌԴ-ի դեսպանատան ռմբակոծումը դատապարտող հայտարարությունը

ՄԱԿ-ի Անվտանգության խորհրդին չի հաջողվել համաձայնության գալ Դամասկոսում ռուսական դեսպանատան գնդակոծումը դատապարտող հայտարարության բովանդակության վերաբերյալ, քանի որ որոշ երկրներ հրաժարվել են աշխատել Մոսկվայի առաջարկած տեքստի հետ. այս մասին տեղեկացրել է կազմակերպությունում ՌԴ-ի մշտական ներկայացուցչության մամլո քարտուղար Ֆյոդոր Ստրժիժովսկին:

Նրա խոսքով՝ ռուսական պատվիրակության կողմից առաջարկված հակիրճ տեքստը հիմնված է եղել «հակաահաբեկչության և դիվանագիտական ներկայացուցչությունների անձեռնմխելիության վերաբերյալ ստանդարտ ձևակերպումների վրա»:

«Ափսոսանքով պետք է փաստենք, որ Անվտանգության խորհրդի որոշ անդամներ կրկին հրաժարվեցին քննարկել ծրագրի ռուսական տարբերակը՝ գործողության ահաբեկչական բնույթը հաստատող ապացույցների բացակայության պատճառով: Առաջարկվել է հեռացնել ծրագրի բոլոր կարևոր կետերը: Ստեղծված պայմաններում ռուսական կողմն անիմաստ է համարում այդ փաստաթղթի շուրջ աշխատանքների շարունակումը»,- հայտարարել է Ստրժիժովսկին:

Մշտական ներկայացուցչության տվյալներով՝ հուլիսի 24-25-ը Դամասկոսում Ռուսաստանի դեսպանատունը «որոշ ռմբակոծությունների է ենթարկվել մայրաքաղաքային Ջոբար շրջանից, որում մեծ թվով ահաբեկչական խմբավորումներ են մնացել»: Երեկ՝ հուլիսի 25-ին՝ Անվտանգության խորհրդի՝ մերձավորարևելյան հարցերով նիստի ժամանակ, ՌԴ-ի մշտական ներկայացուցչի տեղակալ Վլադիմիր Սաֆրոնկովը գործընկերներին կոչ է արել ընդունել միջադեպը դատապարտող հայտարարությունը:

ՏԱՍՍ-ի փոխանցմամբ՝ մշտական ներկայացուցչությունում չեն մանրամասնել, թե կոնկրետ որ երկրներն են խանգարել հայտարարության ընդունմանը: «Չնայած գործընկերների կողմից հակաահաբեկչական պայքարի առաջնահերթության խոստումներին՝ նրանք ամեն անգամ փորձում են շեղել հարվածները նրանցից, ովքեր ենթադրաբար կարող են ծառայել Սիրիայում կործանարար աշխարհաքաղաքական ծրագրերի իրականցմանը: Վաղուց ժամանակն է ոչ թե խոսքով, այլ գործով ապացուցել սիրիական հակամարտության քաղաքական կարգավորման հավատարմությունը և ձգտել ահաբեկչության դեմ պայքարում ուժերի միավորմանը: Եվ վատ չէր լինի խելքի բերել Ջոբարում և այլ վայրերում գտնվող «հրաձիգներին»»:

Նշենք, որ Ռուսաստանը բազմիցս փորձել է ՄԱԿ-ի Անվտանգության խորհրդում հաստատել Սիրիայում իր դեսպանատան գնդակոծությունների դատապարտման հայտարարությունները: Որոշ դեպքերում այդ փորձերն արգելափակվել են արևմտյան երկրների կողմից, որոնք պնդել են բովանդակության մեջ Ռուսաստանի համար անընդունելի պայմաններ ավելացնել: