Չերնոգորիան, Ալբանիան, Նորվեգիան և Ուկրաինան երկարաձգել են հակառուսական պատժամիջոցները
Եվրամիության չորս գործընկեր երկրներ՝ Չերնոգորիան, Ալբանիան, Նորվեգիան և Ուկրաինան, մինչև 2018 թ. հունվարի 31-ը երկարաձգել են Ռուսաստանի նկատմամբ տնտեսական պատժամիջոցները. այս մասին ասվում է ԵՄ դիվանագիտության ղեկավար Ֆեդերիկա Մոգերինիի հայտարարության մեջ:
«Եվրամիության թեկնածու երկրներ Չերնոգորիան և Ալբանիան, Եվրապական ազատ առևտրային համագործակցության անդամ Նորվեգիան, ինչպես նաև Ուկրաինան միացել են Եվրախորհրդի որոշմանը: ԵՄ-ն ողջունում է այդ պարտավորությունների իրականացումը»,- նշվում է հայտարարության մեջ:
Ինչպես նշում է ՏԱՍՍ-ը, հունիսի 28-ին Եվրամիության խորհուրդը վեց ամսով երկարաձգել է հակառուսական տնտեսական պատժամիջոցները՝ սահմանելով դրանք մինչև 2018 թ. հունվարի 31-ը:
Եվրամիության պատժամիջոցային քաղաքականությունը ներառում է երեք անկախ ուղղություն՝ Ռուսաստանի քաղաքացիների նկատմամբ մուտքի արտոնագրերի տրամադրման սահմանափակումներ (գործում են մինչև սույն թվականի սեպտեմբեր), տնտեսական պատժամիջոցներ ռուսական պետական նավթային, պաշտպանական և ֆինանսական ոլորտների մի շարք ընկերությունների դեմ (երկարաձգվել է մինչև 2018 թ. հունվարի 31-ը), Ղրիմի նկատմամբ սահմանափակող միջոցառումներ (մինչև 2018 թ. հունիսի 23-ը):