Ճապոնիայի վարչապետը փոփոխություններ է կատարել կառավարության կազմում
Ճապոնիայի կառավարությունն ամբողջական կազմով հրաժարական է տվել՝ նախարարների կաբինետի փոփոխություններին ընդառաջ. այս մասին տեղեկացնում է ՏԱՍՍ-ը:
Ինչպես նշվում է, այս ընթացակարգն անհրաժեշտ է կառավարությունում փոփոխություններ իրականցնելու համար: Ճապոնիայի վարչապետ Սինձո Աբեն հաստատել է դրա նոր կազմը՝ փոխելով 19 նախարարներից 14-ին:
Լենտա-ի փոխանցմամբ՝ իրենց պաշտոնները պահպանել են ֆինանսների նախարար Տարո Ասոն, կառավորության գլխավոր քարտուղար Եսիհիդե Սուգան, ինչպես նաև Ռուսաստանի հետ տնտեսական համագործակցության համար պատասխանատու էկոնոմիկայի նախարար Հիրոսիգե Սեկոն:
Արտաքին գործերի նախարար է նշանակվել Տարո Կոնոն՝ երկրի տարածքում ամերիկյան զինված ուժերի կարգավիճակի համաձայնագրի վերանայման կողմնակիցներից մեկը: Պաշտպանության նախարար է դարձել Իցունորի Օնոդերեն, որն այդ պաշտոնը զբաղեցրել է 2012-2014 թ․թ.:
Ճապոնիայի կայսր Ակիհիտոն պաշտոնապես հաստատել է երկրի կառավարության նոր կազմը: Այս առիթով հանդիսավոր միջոցառում է կազմակերպվել Տոկիոյի թագավորական պալատում:
Կառավարության կազմի մեծածավալ փոփոխությունները կապված են վարչապետի ղեկավարած իշխող Լիբերալ-դեմոկրատական կուսակցության վարկանիշի անկման հետ: Նախարարների կաբինետի կազմում փոփոխություններ իրականացնելով՝ Աբեն հույս ունի դադարեցնել վարկանիշի անկումը և վերադարձնել ընտրողների վստահությունը: