Հորդանանը և Պաղեստինն ստեղծել են Իսրայելի գործողություններին արձագանքելու շտաբ. ԶԼՄ-ներ

Հորդանանի թագավոր Աբդալլա 2-րդը, որն օգոստոսի 7-ին ժամանել է Հորդանան գետի արևելյան ափին գտնվող Ռամալա քաղաքը, բանակցություններ է անցկացրել Պաղեստինի նախագահ Մահմուդ Աբբասի հետ։ WAFA գործակալության փոխանցմամբ՝ Պաղեստինի արտգործնախարար Ռիյադ ալ Մալիքին լրագրողներին հայտնել է, որ հանդիպման արդյունքում որոշվել է ստեղծել «երկկողմ ճգնաժամային շտաբ, որն զբաղվելու է Ալ Աքսա մզկիթի դեմ իսրայելական մեքենայություններին արձագանքելով»։

«Դա արվել է՝ հաշվի առնելով, որ Իսրայելական կառավարության գլխին կանգնած է Բինյամին Նեթանյահուն, և մենք պետք է նրանից նոր սադրանքներ սպասենք»,- ընդգծել է ալ Մալիքին։ Նա նշել է, որ Նեթանյահուն և նրա կաբինետը «ձգտում են փոխել Տաճարի լեռան ներկայիս կարգավիճակը»։

«Մենք պետք է դասեր քաղենք և պատրաստ լինենք ցանկացած մարտահրավերի»,- ասել է նախարարը։

Ինչպես նշում է ՏԱՍՍ-ը, հուլիսի 21-ին Աբբասը հայտարարել է Իսրայելի հետ հարաբերությունների սառեցման մասին, այդ թվում նաև պաշտպանական ոլորտում։ Նրա խոսքով՝ «այդ որոշումն ուժի մեջ կլինի քանի դեռ իսրայելական իշխանությունները չեն չեղարկել Ալ Աքսա մզկիթի  և ընդհանրապես Պաղեստինի ժողովրդի դեմ սահմանված միջոցառումները»։

Նշենք, որ հուլիսի 27-ին իսրայելական իշխանությունները մետաղական դետեկտորներ և տեսահսկող սարքեր էին տեղադրել Տաճարի լեռան վրա, որի դեմ բողոքել էին արաբ բնակիչները. դա հանգեցրել էր զանգվածային բախումների։

Պաղեստինի ոստիկանության պաշտոնական ներկայացուցիչ Նաբիլ Աբու Ռուդեյնի փոխանցմամբ՝ թագավոր Աբդուլլա 2-րդը և Աբբասը հաստատել են երկկողմ սերտ համագործակցության անհրաժեշտությունը։ «Հորդանանը լիակատար աջակցություն է ցուցաբերել պաղեստինցի ժողովրդին և նրա ղեկավարությանը։ Աբբասն իր հերթին շնորհակալություն է հայտնել Աբդուլլա 2-րդին պաղեստինցիների և Երուսաղեմի սրբությունների օգտին նրա ձեռնարկած ջանքերի համար»։