Ամբողջ աշխարհը ցնցված է ԱՄՆ-ի անկանխատեսելի քաղաքականությունից․ Գերմանիայի ԱԳ նախարար

Գերմանիայի արտաքին գործերի նախարար Սիգմար Գաբրիելը քննադատել է ԱՄՆ նախագահ Դոնալդ Թրամփի «անհասկանալի ռազմատենչ հռետորաբանությունը» Հյուսիսային Կորեայի շուրջ ստեղծված իրավիճակում։ «Նման հակամարտություններն սկսվում են հայտարարություններով և ավարտվում ռազմական գործողություններով», - Kolner Stadt-Anzeiger թերթին տված հարցազրույցում ասել է Գաբրիելը։

«Ամբողջ աշխարհը ցնցված է ԱՄՆ-ի անկանխատեսելի քաղաքականությունից։ Դժվար է հասկանալ, թե ով է այնտեղ գլխավորը», - հայտարարել է Գերմանիայի ԱԳ նախարարը՝ ընդգծելով, որ այն ժամանակ, երբ պետքարտուղար Թիլերսոնը և պաշտպանության նախարար Ջեյմս Մեթիսը սխալ են համարում ԱՄՆ-ի ռազմական միջամտությունը, Թրամփի շրջակայքում հայտնվում են մարդիկ, որոնք ճիշտ են համարում ուժ կիրառելը։

«Սա հակասում է մինչ այժմ Արևմուտքը միավորող համամարդկային արժեքներին՝ ժողովրդավարությանը, ազատությանը և օրենքի գերակայությանը։ Փաստը, որ ԱՄՆ-ը հրաժարվում է այս արժեքներից, թուլացնում է Արևմուտքը», - ասել է Գերմանիայի արտաքին քաղաքական գերատեսչության ղեկավարը։

Գաբրիելի խոսքով՝ Հյուսիսային Կորեայի շուրջ ծագած հակամարտությունը պետք է արագորեն լուծել քաղաքական ճանապարհով, այլապես «իրավիճակի յուրաքանչյուր էսկալացիա կարող է հանգեցնել պատերազմի»։