Վրաստանի դատախազությունը Սաակաշվիլիի արտահանձնման վերաբերյալ Կիևին հարցում է ուղարկել
Վրաստանի Գլխավոր դատախազությունը մի քանի երկրների՝ այդ թվում և Ուկրաինայի իրավապահ մարմիններին է ուղարկել երկրի նախկին նախագահ Միխաիլ Սաակաշվիլի արտահանձնման դիմումը. այս մասին տեղեկացրել է «Իմեդի» հեռուստաալիքը՝ հղում կատարելով վերահսկիչ մարմնի գրավոր պատասխանին:
«Միխաիլ Սաակաշվիլիի խնդրանքով՝ Գլխավոր դատախազությունը բանակցություններ է վարում տարբեր երկրների իրավասու մարմինների հետ, իրականացվում են բոլոր անհրաժեշտ համապատասխան միջոցառումները»,- ասվում է հայտարարության մեջ: Նամակում նշվում է, որ վրացական դատախազությունը ուկրաինական կողմին է ուղարկել Սաակաշվիլիի արտահանձնաման հարցումը՝ հավելելով, որ «Վրաստանի Գլխավոր դատախազությունն ակտիվորեն համագործակցում է Ուկրաինայի Գլխավոր դատախազության հետ»:
Հուլիսի վերջին Վրաստանի արդարադատության նախարար Թեյա Ցուլուկիանին պատրաստակամություն էր հայտնել Սաակաշվիլիի արտահանձնումը պահանջել ցանկացած այն երկրից, որն Ուկրաինայի քաղաքացիությունից զրկվելուց հետո նախկին նահագահը կընտրի որպես բնակության վայր:
«Եթե դա լինի Ուկրաինան, ապա այդ երկրի հետ մեր բոլոր իրավական գործընթացները ավարտված են, և բոլոր ապացույցները, որոնք մենք հավաքել ենք 2014-2015 թ․թ., արդեն փոխանցվել են ուկրաինական կողմին: Ինչ վերաբերում է մյուս երկրներին, օրինակ՝ ԱՄՆ-ին, եթե նախկին նախագահը որոշի մնալ այնտեղ, ապա մեզ իրավաբանական խորհրդատվություններ անհրաժեշտ կլինեն այդ երկրների հետ»,- պարզաբանել է նախարարը:
Ինչպես նշում է ՏԱՍՍ-ը, այս շաբաթվա սկզբին Վրաստանի նախկին նախագահ և Օդեսայի նախկին նահանգապետ Միխաիլ Սաակաշվիլին հայտարարել էր, որ մտադիր է սեպտեմբերի 10-ին վերադառնալ Ուկրաինա:
Հիշեցնենք, որ 2017 թ. հուլիսի 26-ին Ուկրաինայի նախագահ Պետրո Պորոշենկոն Սաակաշվիլիին զրկել էր քաղաքացիությունից: Հուլիսի երկրորդ կեսին նա եղել է ԱՄՆ-ում, օգոստոսի սկզբին՝ Լեհաստանում, ապա Լիտայում և Հունգարիայում: