Լատինական Ամերիկայի երկրները դատապարտել են Վենեսուելայի Սահմանադրական հանձնաժողովի լիազորությունների ընդլայնումը
Իսպանիայի խորհրդարանը և Արևմտյան կիսագնդի ութ երկրներ «ժողովրդավարական կարգի խախտում են» անվանել Սահմանադրական հանձնաժողովի կողմից Ազգային ժողովի լիազորություններն ստանձնելու որոշումը. այս մասին ասվում է Չիլիի խորհրդարանի Պատգամավորների պալատի պաշտոնական կայքում հրապարակված համատեղ հայտարարության մեջ:
«Վերոնշյալ երկրների խորհրդարանների նախագահները և ներկայացուցիչները հայտարարել են, որ քննադատում են Վենեսուելայում ժողովրդավարական և սահմանադրական կարգի խախտումը, այդ թվում և Սահմանադրական հանձնաժողովի կողմից Ազգային ժողովի լիազորությունների յուրացումը, որն ամրապնդել է բռնատիրությունը երկրում»,- ասվում է փաստաթղթում:
Հայտարարության մեջ նաև նշվում է, որ Պերուի, Բրազիլիայի, Կոստա Ռիկայի, Իսպանիայի, Արգենտինայի, Պանամայի, Չիլիի, Մեքսիկայի և Կանադայի օրենսդիր մարմինները «չեն ճանաչում Սահմանադրական հանձնաժողովը և դրա ընդունած որոշումները՝ Վենեսուելայի սահմանադրության խախտման պատճառով»: Նրանք դատապարտել են նաև Վենեսուելայի «Ազգային ժողովի անդամների հետապնդումը», որոնց մեծ մասը ընդդիմության ներկայացուցիչներ են:
Ինչպես նշում է ՏԱՍՍ-ը, ավելի վաղ Սահմանադրական հանձնաժողովը հայտարարել էր, որ իր վրա է վերցնում «խաղաղության պահպանմանը, սոցիալ-տնտեսական ու ֆինանսական համակարգերին և պետական խնդիրներին վերաբերող» օրենսդրական լիազորությունները: