Հնագետները պատրաստվում են ստեղծել ղրիմյան Ակրա անտիկ քաղաքի եռաչափ մոդելը

Ղրիմի Ստորջրյա հետազոտությունների սևծովյան կենտրոնի մասնագետներն սկսել են ջրասույզ եղած անտիկ Ակրա քաղաքի եռաչափ քարտեզ-սխեմայի ստեղծման աշխատանքները. գրում է ՏԱՍՍ-ը:

«Այս արշավի ընթացքում մենք առաջին անգամ օգտագործել են լուսանկարաչափության նոր մեթոդ, որի միջոցով լուսանկաներից ստեղծվում են ստորջրյա օբյեկտների եռաչափ մոդելներ: Դա կլինի Ակրայի 3D տարբերակը: Այդ ուղղությամբ աշխատանքներն արդեն սկսվել են»,- հայտնել է արշավախմբի ղեկավար և կենտրոնի փոխտնօրեն Վիկտոր Վախոնեևը:

Նրա խոսքով՝ այս մոդելը թույլ կտա ապագայում տարբեր կառույցներ վերաստեղծել ջրի տակ, օրինակ՝ քաղաքային թաղամասեր, փողոցներ, տներ, պաշտպանական պատեր: «Սա շատ հարմար մեթոդ է, քանի որ այժմ հնագետները ջրի տակ սահմանափակ տեսանելության պայմաններում են աշխատում»,- նշել է Վախոնեևը՝ հավելելով, որ ներկայիս՝ թվով յոթերորդ արշավի ընթացքում ուսումնասիրվել են քաղաքի երեք հատվածներ՝ ընդհանուր առմամբ 3 հեկտար մակերեսով:

«Աշխատանքներն իրականացվել են երեք հատվածներում՝ երկու ստորջրյա և մեկ ափամերձ: Ջրի տակ ուսումնասիրվել են քաղաքային կառույցներ, ցամաքում՝ պաշտպանական պատի հատվածներ: Իրականացվել է նաև ավազանի ձայնային սկանավորում, որը թույլ կտա ծրագիր մշակել հաջորդ տարվա համար»,- ասել է արշավախմբի ղեկավարը:

Ինչպես նշում է ՏԱՍՍ-ը, ջրի մակերեսին մի շարք գտածոներ են հայտնաբերվել, որոնց թվում են անտիկ շրջանի փայտե մի սանր և կավե սպասքի կտորներ: Բոլոր գտածոները հանձնվելու են Արևելյան Ղրիմի պատմամշակութային թանգարան-արգելոցին:

Ակրա քաղաքը գոյություն է ունեցել մ.թ.ա. V դարից մինչև մ.թ. III դարի վերջ և եղել է Կերչ թերակղզում գտնվող Բոսֆորի թագավորության կազմում՝ զբաղեցնելով 3,5 հեկտար տարածք: Հին քաղաքն անվանում են «Ղրիմյան Ատլանտիդա», այն պաշտպանված է եղել վեց մետրանոց պաշտպանական պարիսպով: Այժմ քաղաքի 90% ջրի տակ է: