Տեխասում «Հարվի» փոթորկի պատճառով գրանցվել է 700 բարել նավթի արտահոսք
«Հարվի» փոթորկի հետևանքով ջրհեղեղից տուժած ԱՄՆ-ի Տեխաս նահանգի մի քանի պահոցներում 700 բարել (111,300 լիտր) նավթի արտահոսք է արձանագրվել. այս մասին տեղեկացրել է Associated Press-ը:
Գործակալության տվյալներով՝ ջրհեղեղի արդյունքում Հաուհայմ քաղաքում տապալվել է նավթամթերքի երկու ամբար: Դրանք պատկանում են ConocaPhillips-ի մասը կազմող Burlington Resources նավթագազային ընկերությանը:
Արդյունքում դրանցից մեկից արտահոսել է 385 բարել (ավելի քան 61 հազար լիտր) նավթ, իսկ երկրորդից՝ ավելի քան 310 բարել (մոտ 50 հազար լիտր) հումք: Associated Press-ը նշում է, որ դեռևս հայտնի չէ՝ հաջողվել է հավաքել թափված նավթը, թե ոչ:
Մեքսիկական ծոցում ձևավորված չորրորդ կարգի «Հարվի» փոթորիկը հարվածել է Տեխասին օգոստոսի 26-ի գիշերը: Այն աստիճանաբար նվազել է՝ հասնելով մրրիկի, ապա՝ այսպես կոչված «արևադարձային դեպրեսիայ» աստիճանի: Այժմ այս մթնոլորտային երևույթը հասել է Լուիզիանա նահանգ և շարունակում է շարժվել դեպի մայրցամաքի խորքը:
Ինչպես նշում է ՏԱՍՍ-ը, իշխանությունները դժվարանում են հայտնել աղետի զոհերի ճշգրիտ թիվը: ԶԼՄ-ների փոխանցմամբ՝ մինչև այժմ «Հարվի»-ին զոհ է դարձել մոտ 30-40 մարդ: