ԵՄ-ն Լոնդոնից պահանջում է մինչև 2023 թ. վճարել Բրյուսելի հաշիվները

Եվրահանձնաժողովը Մեծ Բրիտանիայի կառավարությունից պահանջել է կատարել իր բոլոր պարտավորությունները անգամ կառույցից դուրս գալուց հետո՝ մինչև 2023 թ.: Այս մասին Welt am Sonntag թերթին տված հարցազրույցի ընթացքում հայտարարել է բյուջեի և մարդկային ռեսուրսների հարցերով եվրահանձնակատար Գյունտեր Օթինգերը:

«Եվրամիությունն ակնկալում է, որ բրիտանացիները կկատարեն իրենց տված խոստումները: Նրանք պետք է մինչև 2020 թ. ամբողջությամբ կատարեն ֆինանսական պարտավորությունները և մինչև 2023 թ. կատարեն ԵՄ-ի վճարումները»,- ասել է նա:

Օթինգերը հավելել է նաև, որ Բրյուսելը Լոնդոնի հետ չի քննարկելու առևտրային և այլ համաձայնություններ, քանի դեռ «հիմնական հարցերը չեն հստակեցվել»: Եվրահանձնակատարը պարզաբանել է, որ խոսքը Բրեքզիթից հետո Եվրամիության նկատմամբ ունեցած ֆինանսական պարտավորությունների, Մեծ Բրիտանիայում գտնվող ԵՄ-ի քաղաքացիների իրավունքների և թագավորության կազմի մեջ մտնող Հյուսիսային Իռլանդիայի և Իռլանդիայի Հանրապետության միջև սահմանների կարգավիճակի մասին է: «Դա պարզից էլ պարզ է: Այս հարցերում խաղերը տեղ չունեն, և մենք անդրդվելի ենք»,- ամփոփել է նա:

Հիշեցնենք, որ Եվրամիությունից Մեծ Բրիտանիայի դուրս գալու վերաբերյալ հանրաքվեն անցկացվել է անցյալ տարվա հունիսին: Քվեարկության արդյունքում՝ հաղթանակ տարան Բրեքզիթի կողմնակիցները՝ 51,9%-ով:

Հիշեցնենք, որ բանակցությունների երկրորդ փուլն սկսվել է օգոստոսի 28-ին և տևել է չորս օր: Այս փուլով ավարտվել է դուրս գալու պայմաններին վերաբերող առաջին էտապը: Բանակցությունների երրորդ փուլը կսկսվի հոկտեմբերին, որի ընթացքում բրիտանական կողմը հույս ունի դուրս գալ Բրեքզիթի խնդիրների շրջանակներից և սկսել քննարկել Մեծ Բրիտանիայի և ԵՄ-ի միջև ազատ առևտրի պայմանները: