Իրանի միջուկային ծրագրի համաձայնագիրը պատկանում է ամբողջ աշխարհին, այլ ոչ թե ԱՄՆ-ին․ Մոգերինի
Իրանի միջուկային ծրագրի վերաբերյալ համաձայնագիրն ուժի մեջ է, և Թեհրանը կատարում է իր պարտավորությունները։ Այս մասին Նյու Յորքում լրագրողների հետ զրույցում հայտարարել է արտաքին գործերի և անվտանգության քաղաքաղականության հարցերով գլխավոր եվրահանձնակատար Ֆեդերիկա Մոգերինին։
«Ես բազմիցս հայտարարել եմ, որ համաձայնագիրը գործում է, իսկ ԱՏԷՄԻԳ-ը (Ատոմային էներգիայի միջազգային գործակալություն) յոթ անգամ հաստատել է, որ Իրանը կատարում է իր պարտավորությունները», - ասել է Եվրոպայի արտաքին քաղաքականության ղեկավարը։
Մեկնաբանելով համաձայնագրից ԱՄՆ-ի դուրս գալու հնարավորությունը՝ Մոգերինին ընդգծել է, որ այդ համաձայնագիրը չի կնքվել «ինչ-որ մի պետության կողմից»։ «Այս համաձայնագիրը պատկանում է միջազգային հանրությանը», - ասել է եվրահանձնակատարը։
Մոգերինին հիշեցրել է, որ սեպտեմբերի 20-ին տեղի է ունենալու միջուկային գործարքի իրագործման հարցով միջազգային միջնորդների վեցնյակի (Ռուսաստան, Մեծ Բրիտանիա, Չինաստան, ԱՄՆ, Գեմանիա, Ֆրանսիա) և Իրանի միջև նախարարական հանդիպում։ Նրա խոսքով՝ սա լավ նշան է, քանի որ այսպիսի հանդիպումները մշտապես կայացել են արտաքին գործերի փոխնախարարների մակարդակով։
Հիշեցնենք, որ 2015 թ. հուլիսին Իրանը և միջազգային միջնորդերի վեցնյակը (ԱՄՆ, Ռուսաստան, Չինաստան, Մեծ Բրիտանիա, Ֆրանսիա, Գերմանիա) համաձայնության եկան Թեհրանի միջուկային ծրագրի շուրջ և ստեղծեցին Համատեղ համապարփակ գործողությունների ծրագիր: Իրանը պարտավորվեց սահմանափակել ուրանի հարստացման ոլորտում տարվող աշխատանքները՝ մի շարք պատժամիջոցների չեղարկման փոխարեն: 2016 թ․ հունվարին համաձայնագիրը թևակոխել է կենսագործման փուլ։