Չեխիայում մեկնարկել են խորհրդարանական ընտրությունները
Չեխիայում մենարկել են խորհրդարանի ստորին պալատի ընտրությունները։ Այստեղ այն անցկացվում է երկու օրով՝ հոկտեմբերի 20-ին և 21-ին։ Առաջին օրն ընտրատեղամասերը բաց կլինեն ժամը 14:00-ից մինչև 22:00, իսկ հաջորդ օրը՝ 08:00-ից 14:00։
Խորհրդարանի ստորին պալատի ընտրություններին մասնակցում է 31 քաղաքական կուսակցություն և շարժում, ինչը ռեկորդային է այս պետության համար։ Պատգամավորական 200 տեղի համար կպայքարեն մոտ 7,5 հազար թեկնածուներ, որոնց 28%-ը կին է։
Ընտրությունների հաղթողի անվիճելի հավակնորդ է համարվում 2011 թ․ ստեղծված կենտրոնամետ ANO (Akce nespokojených občanů․ թարգմանաբար նշանակում է «դժգոհ քաղաքացիների շարժում», - խմբ․) կուսակցությունը, որի նախագահը միլիարդատեր Անդրեյ Բաբիշն է։ Վերջին սոցհարցումները ցույց են տալիս, որ ANO-ի օգտին կքվեարկի ընտրողների 30%-ը։ Այս ցուցանիշը գրեթե երկու անգամ գերազանցում է հակառակորդներ կոմունիստական և սոցիալ-դեմոկրատական կուսակցություններին։
Անձամբ Բաբիշը չի թաքցնում վարչապետ դառնալու իր ձգտումները։ Նրան կարող է խանգարել միայն արդարադատության համակարգը։ Սեպտեմբերի սկզբից ANO-ի ղեկավարի նկատմամբ հետաքննություն է ընթանում։ Նա կասկածվում է իր ընկերություններից մեկի օգտին Եվրամիությունից խարդախությամբ մոտ 2,3 միլիոն դոլարի սուբսիդիա ստանալու մեջ։
Բաբիշը պնդում է, որ իր դեմ առաջադրված մեղադրանքների հետևում կանգնած են իր քաղաքական հակառակորդները։
Չեխիայի կոմունիստական կուսակցությունը հավակնում է դառնալ երկրորդ ամենաշատ ձայն հավաքած քաղաքական ուժն այս ընտրություններում։ Անցկացված սոցհարցումների համաձայն՝ այս կուսակցության օգտին կքվեարկեն ընտրողների մոտ 14%-ը, որոնց մեծ մասը՝ գյուղերի բնակիչներ և տարեցներ։ Այս կուսակցությունն առաջարկում է դուրս գալ ՆԱՏՕ-ի և Եվրոպական Միության կազմից։ Սա նշանակում է, որ բացառվում է այս կուսակցության համագործակցությունը որևէ այլ քաղաքական ուժի հետ, այդ թվում՝ սոցիալ-դեմոկրատների։
Սոցիալ-դեմոկրատական կուսակցությունը, որը հաղթել էր չորս տարի առաջ կայացած ընտրություններում, բավականին զիջել է դիրքերը։ Նրանք չեն կարողանում ոչ մի նոր բան առաջարկել ընտրողներին։ Օրերս կուսակցության առաջնորդները՝ վարչապետը, արտաքին գործերի նախարարը, ներքին գործերի նախարարը և այլ պաշտոնյաներ, երթի էին դուրս եկել Պրահայի կենտրոնում՝ ձեռքներին «Յուրաքանչյուր քաղաքացուն արժանի աշխատավարձ» գրություններով պաստառներ։ Սա քաղաքացիների մոտ հարց է առաջացրել․ որտե՞ղ էին նրանք վերջին չորս տարիներին և ինչու՞ չէին ապահովում այդ «արժանի աշխատավարձը»՝ ունենալով դրա համար բոլոր լծակները։