Կատալոնիան կա և կլինի Իսպանիայի անբաժան մասը․ Իսպանիայի թագավոր

Կատալոնիան Իսպանիայի կարևոր մասն է և այդպիսին կմնա նաև ապագայում։ Այս մասին հատարարել է Իսպանիայի թագավոր Ֆիլիպ VI-ը․ հայտնում է Television Espanola հեռուստաալիքը։

«Իսպանիան պետք է հակազդի պետության որևէ երկրամասի առանձնացման անընդունելի փորձերին։ Կատալոնիան կա և կլինի 21-րդ դարի Իսպանիայի անբաժան մասը» - ասել է թագավորը։

Նա վստահություն է հայտնել, որ Մադրիդը կկարողանա հարթել ստեղծված իրավիճակը՝ «հարգելով երկրի սահմանադրությունը, ժողովրդավարական ինստիտուտները, արժեքները և խորհրդարանական ժողովրդավարության սկզբունքները»։

«Մենք միասին կիսել ենք ձեռքբերումները և անհաջողությունները, հաղթանակները և պարտությունները, որոնք մեզ միավորել են ուրախության և տխրության պահերին», - շարունակել է Իսպանիայի թագավորը։

Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։ Կատալոնիայի կառավարության ղեկավար Կարլոս Պուչդեմոնը հայտարարել է, որ Բարսելոնայի և Մադրիդի միջև առկա տարաձայնությունը հաթելու համար անհրաժեշտ է երրորդ ուժի միջնորդություն։

Օրեր  առաջ էլ Կատալոնիայի ղեկավար Կարլոս Պուչդեմոնը նամակ էր ուղարկել Իսպանիայի վարչապետ Մարիանո Ռախոյին՝ սպառնալով, որ ինքնավարության խորհրդարանում քվեարկության կդնի անկախության հարցը, եթե Մադրիդը չգնա երկխոսության։ Ի պատասխան՝ Մադրիդը հայտարարել էր, որ պատրաստվում է Սահմանադրությամբ սահմանված կարգով սահմանափակել Կատալոնիայի ինքնավարությունը։