Ադրբեջանի զինված ուժերի հերթական հարձակումը․ կիրառվել է հակատանկային հրթիռ (տեսանյութ)
Երեկ՝ հոկտեմբերի 22-ին Ադրբեջանի զինված ուժերը հերթական հարձակումն են իրականացրել Արցախի Պաշտպանության բանակի դիրքերի ուղղությամբ։ Այս անգամ հակամարտ զորքերի շփման գծի հյուսիսարևելյան (Մարտակերտ-Մատաղիս) ուղղությամբ կիրառվել է հրետանային զինատեսակներ։ Այս մասին տեղեկացնում է Արցախի Հանրապետության պատպանության նախարարությունը։
«Ադրբեջանի զինված ուժերը խախտելով վերջերս ԵԱՀԿ Մինսկի խմբի համանախագահների միջնորդությամբ Հայաստանի և Ադրբեջանի նախագահների միջև Ժնևում տեղի ունեցած հանդիպման ժամանակ ձեռք բերված պայմանավորվածությունը, հակամարտ զորքերի շփման գծի հյուսիսարևելյան (Մարտակերտ-Մատաղիս) ուղղությամբ կիրառել են հրետանային զինատեսակներ, հայկական դիրքերի վրա արձակելով ականանետի 5 արկ և «ՍՊԱՅԿ» տիպի մեկ հակատանկային հրթիռ: Կատարվածը փաստում է, որ, ինչպես միշտ, Բաքուն ոչ միայն հակված չէ ձեռքբերված պայմանավորվածությունը նպատակաուղղել հակամարտության խաղաղ կարգավորմանն ու չարդարացված կորուստների բացառմանը, այլև հակառակը՝ կանխամտածված սադրանքների միջոցով գնում է իրադրության ապակայունացմանը», - ասվում է Արցախի պաշտպանության նախարարության մամլո ծառայության տարածած հաղորդագրության մեջ։
Նշվում է նաև, որ Արցախի զինված ուժերը ձեռնպահ են մնացել պատասխան գործողություններից՝ հաշվի առնելով միջազգային հանրության և, մասնավորապես, ԵԱՀԿ Մինսկի խմբի կողմից ադրբեջանա-արցախյան հակամարտության խաղաղ կարգավորմանն ուղղված գործընթացների արդյունավետ իրականացման անհրաժեշտությունը։