Անկարայի քաղաքապետը հրաժարական է տվել Էրդողանի հետ հանդիպումից հետո
Անկարայի քաղաքապետ Մելիհ Գյոքչեքը, որը Թուրքիայում իշխող «Արդարություն և զարգացում» կուսակցության անդամ է, որոշել է հրաժարական տալ նախագահ Ռեջեփ Թայիփ Էրդողանի հետ հանդիպումից հետո։ Այս մասին Գյոքչեքը հայտնել է թվիթերյան գրառման միջոցով։
«Այսօր մենք զրուցել ենք նախագահի հետ։ Հույս ունեմ՝ Անկարայի քաղաքային խորհուրդը շաբաթ օրը կհավաքվի հերթական նիստին, իսկ ես հրաժարական կտամ», - գրել է Թուրքիայի մայրաքաղաքի ղեկավարը։
Մելիհ Գյոքչեքն Անկարայի քաղաքապետ է ընտրվել 1994 թվականին։ Հետո նա ևս չորս անգամ վերընտրվել է այդ պաշտոնին։
Թուրքական ԶԼՄ-ները Գյոքչեքի հրաժարականը կապում են ԱԶԿ-ի շարքերում Էրդողանի սկսած փոփոխությունների հետ։ Ավելի վաղ հրաժարական էին ներկայացրել Ստամբուլի քաղաքապետ Քադիր Թոփբաշը և ևս մի քանի նահանգապետեր։