ՌԴ Դաշնային խորհրդի միջազգային գործերով հանձնաժողովի նախագահը հեռացրել է իր թվիթերյան հաշիվը

ՌԴ Դաշնային ժողովի Դաշնային խորհրդի միջազգային գործերով հանձնաժողովի նախագահ Կոնստանին Կոսաչևը հեռացրել է իր թվիթերյան հաշիվը RT և Sputnik գործակալությունների նկատմամբ ցանցի որոշումից հետո։ Այս մասին հայտնում է Ռիա Նովոստի-ն։

Ավելի վաղ Twitter-ը հայտնել էր, որ, պայմանավորված ամերիկյան նախագահական ընտրություններին ռուսական միջամտության գործի հետաքննությամբ, որոշվել է արգելափակել այն հաշիվների գովազդները, որոնք պատկանում են RT և Sputnik գործակալություններին։ RT-ի հետ զրույցում Կոսաչևը հայտարարել է, որ Twitter-ի իր հաշիվը հեռացրել է որպես համերաշխության նշան այս գործակալություններին։

Սեպտեմբերին Twitter-ի ներկայացուցիչները մասնակցել են ԱՄՆ Սենատի փակ լսումներին, որի ժամանակ քննարկվել է ռուսական այս գործակալությունների՝ «ամերիկյան նախագահական ընտրություններին միջամտելու» հարցը։ Twitter-ի հավաստմամբ՝ 2016 թվականին այս գործակալությունները 274 հազար դոլար են ծախսել գովազդների վրա։

RT-ի գլխավոր խմբագիր Մարգարիտա Սիմոնյանն այս առիթով հույս է հայտնել, որ պատասխան քայլեր կկիրառվեն Ռուսաստանում գործող ամերիկյան ԶԼՄ-ների նկատմամբ։

Հետաքննությունների դաշնային բյուրոն և Կոնգրեսը հետաքննություն են իրականացնում ամերիկյան նախագահական ընտրությունների «ռուսական միջամտության» և Դոնալդ Թրամփի՝ Ռուսաստանի հետ կապեր ունենալու գործով, ինչը, ինչպես նշում է Ռիա Նովոստի-ն, հերքում են թե Կրեմլում, թե Սպիտակ տանը։