Կատալոնիայում պաշտոնապես ազդարարել են անկախության գործընթացի մեկնարկը
Այսօր՝ հոկտեմբերի 27-ին, Կատալոնիայի խորհրդարանը ձայների գերակշիռ մեծամասնությամբ հավանության է արժանացրել Իսպանիայից անկախանալու մասին բանաձևը։ Քվեարկության արդյունքները հրապարակել է խորհրդարանի նախագահ Կարմե Ֆորկադելը․ փոխանցում է ՏԱՍՍ-ը։
«Բանաձևն ընդունվել է», - հայտարարել է խորհրդարանի խոսնակը՝ մանրամասնելով, որ կողմ է քվեարկել 70, իսկ դեմ՝ 10 պատգամավոր։ Եվս երկու պատգամավոր դատարկ է թողել քվեաթերթիկը։
Անկախության մասին հայտարարելուց հետո Կատալոիայի վարչապետ Կարլոս Պուչդեմոնը և խորհրդարանի պագամավորները հնչեցրել են Կատալոնիայի հիմնը և հեռացել նիստերի դահլիճից։
ՏԱՍՍ-ի փոխանցմամբ՝ Կատալոնիան «անկախ հանրապետություն» հռչակելուն պետք է հաջորդի արդեն նոր պետության կառավարության ձևավորման գործընթացը։
Կատալոնիայի խորհրդարանն ունի 135 պատգամավոր։ Նշվում է, որ քվեարկությունից առաջ ընդդիմադիր պատգամավորներն ի նշան բողոքի լքել են դահլիճը, քանի որ քվեարկությունը համարում են հակաօրինական։
Իսպանիայի վարչապետ Մարիանո Ռախոյը հայտարարել է, որ Կատալոնիայում անպայման կվերականգնվի օրինականությունը։ Թվիթերյան գրառման միջոցով նա իսպանացիներին հանգստության կոչ է արել։ Իսպանիայի սենատն արդեն միջոցներ է ձեռնարկել, որպեսզի սահմանափակի շրջանի ինքնակառավարումը։
Քվեարկության արդյունքների հրապարակումից հետո դոլարի նկատմամբ եվրոյի փոխարժեքը նվազել է՝ հասնելով 1,159-ի, ինչը հուլիսի 20-ից ի վեր նվազագույն ցուցսնիշն է։ Միաժամանակ Իսպանիայի ֆոնդային գործակիցը նվազել է 2%-ով՝ գրանցելով 10139.8 արդյունք։
Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։