Իսպանիայի վարչապետը լուծարել է Կատալոնիայի խորհրդարանը

Իսպանիայի վարչապետ Մարիանո Ռախոյը լուծարել է Կատալոնիայի խորհրդարանը և նոր ընտրություններ նշանակել դեկտեմբերի 21-ին։ Այս մասին Ռախոյը հայտարարել է նախարարների խորհրդի արտահերթ նիստի արդյունքներն ամփոփող մամուլի ասուլիսի ընթացքում․ հայտնում է ՏԱՍՍ-ը։

Աղբյուրի փոխանցմամբ՝ նա հայտարարել է, որ լուծարում է կատալոնական խորհրդարանը՝ աշխատանքից հեռացնելով ինքնավարության վարչապետ Կարլոս Պուչդեմոնին, ինչպես նաև ոստիկանության պետին։

Ռախոյը նշել է, որ խոսքը ոչ թե «ինքնավարության վերացման մասին է, այլ դրա գործելակերպի շուտափույթ վերականգնման, ինչը նախատեսված է օրենքով»։

Հիշեցնենք, որ այսօր՝ հոկտեմբերի 27-ին, Կատալոնիայի խորհրդարանը ձայների գերակշիռ մեծամասնությամբ հավանության է արժանացրել Իսպանիայից անկախանալու մասին բանաձևը։

Քվեարկության արդյունքների հրապարակումից հետո դոլարի նկատմամբ եվրոյի փոխարժեքը նվազել է՝ հասնելով 1,159-ի, ինչը հուլիսի 20-ից ի վեր նվազագույն ցուցսնիշն է։ Միաժամանակ Իսպանիայի ֆոնդային գործակիցը նվազել է 2%-ով՝ գրանցելով 10139.8 արդյունք։

Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։