Կատալոնացիների միայն 1/3-ն է կողմ անկախությանը․ El Pais

Կատալոնիայի բնակչության միայն 29%-ն է կողմ հանդես գալիս ինքնավարության անկախությանը։ Այս մասին հայտնում է El Pais թերթը՝ հղում կատարելով իսպանական Metroscopia ընկերության անցկացրած սոցհարցմանը։

Հետազոտության համաձայն՝ հարցվածների 46%-ը ցանկանում է, որ Կատալոնիան մնա Իսպանիայի կազմում՝ ստանալով նոր երաշխավորված իրավունքներ։ 19%-ը կարծում է, որ շրջանը պետք է մնա թագավորության կազմում առանց լրացուցիչ նախապատվությունների։ Հարցվածների միայն 29%-ն է նշել, որ Կատալոնիան պետք է դուրս գա Իսպանիայի կազմից։ Մնացած 6%-ի համար Կատալոնիայի ճակատագիրը կարևոր չէ։ Սոցհարցմանը մասնակցել է 500 մարդ։

Հիշեցնենք, որ հոկտեմբերի 27-ին, Կատալոնիայի խորհրդարանը ձայների գերակշիռ մեծամասնությամբ հավանության է արժանացրել Իսպանիայից անկախանալու մասին բանաձևը։ Ավելի ուշ Իսպանիայի Սենատը հավանության է արժանացրել սահմանադրության 155-րդ հոդվածի կիրառումը։

Իսպանիայի վարչապետը նաև հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Մարիանո Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։

Այսօր հայտնի է դարձել նաև, որ Իսպանիայի վարչապետը Կատալոնիայի ղեկավարի պաշտոնին նշանակել է իր առաջին տեղակալ Սորայա Սաենս դե Սանտամարիային, իսկ Իսպանիայի նախարարների խորհուրդն իր վրա է վերցրել Կատալոնիայի կառավարության խորհրդի պատրավորությունները։

Հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։