Հրաժարական է տվել ԵՄ-ում Կատալոնիայի մշտական ներկայացուցիչը

ԵՄ-ում Կատալոնիայի մշտական ներկայացուցիչ Ամադեու Ալթաֆաժը հրաժարական է ներկայացրել, երբ Մադրիդը որոշել է փակել Բրյուսելում Կատալոնիայի ներկայացուցչությունը։ Հրաժարականի մասին պաշտոնական հայտարարությամբ դիվանագետը հանդես է եկել բաց նամակով, որը հրապարակել է կատալոնական Ara թերթը։

«Նախորդ ուրբաթ իսպանական կառավարության ձեռնարկած միջոցառումների շրջանակում ես հրաժարական տվեցի Եվրոպական Միությունում Կատալոնիայի մշտական ներկայացուցչի պաշտոնից», - գրել է Ալթաֆաժը։

Նա խոստովանել է, որ դա իր համար «տխուր պահ էր»։ Դիվանագետի խոսքով՝ Եվրամիությունը բավարար ակտիվություն չի ցուցաբերում կատալոնական ճգնաժամի ընթացքում։

«Եվրոպան պետք է մշտապես նպաստի լուծումների որոնմանը և երկխոսության հաստատմանը», - կարծում է Ալթաֆաժը։

Հոկտեմբերի 27-ին Կատալոնիայի խորհրդարանի՝ անկախության հռչակումից հետո Իսպանիայի Սենատը հավանության է արժանացրել սահմանադրության 155-րդ հոդվածը կիրառելու մասին կառավարության դիմումը։ Այս հոդվածը թույլ է տալիս սահմանափակել Կատալոնիայի ինքնավարությունը։

Ավելի ուշ Իսպանիայի վարչապետ Մարիանո Ռախոյը հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։