Նախագահի պաշտոնում Մակրոնի գործունեությունը դրական է գնահատում ֆրանսիացիների ընդամենը 38%-ը․ Le Figaro

Ֆրանսիայի նախագահ Էմանուել Մակրոնի նկատմամբ երկրում վստահության մակարդակը վերջին հինգ ամիսների ընթացքում նվազել է 19 տոկոսային կետով։ Այս մասին են վկայում Le Figaro շաբաթաթերթի պատվերով Kantar Sofres և OnePoint ընկերությունների անցկացրած սոցհարցման արդյունքները։

Այսպես՝ 2017 թ․ հունիսին Մակրոնի գործունեությունը դրական էր գնահատում ֆրանսիացիների 57%-ը։ Այս պահին այդ ցուցանիշը նվազել է՝ հասնելով 38%-ի։

Նույն սոցհարցման արդյունքները ցույց են տվել, որ բացի Մակրոնից նվազել է նաև վարչապետ Էդուար Ֆիլիպի վարկանիշը։ Վերջին հինգ ամիսների ընթացքում այն նվազել է 13 տոկոսային կետով՝ 49%-ից հասնելով 36% -ի։

Ուսումնասիրությունն անցկացվել է հոկտեմբերի 25-ից 28-ը։ Հարցմանը մասնակցել է մոտ հազար քաղաքացի։

Էմանուել Մակրոնը Ֆրանսիայի 25-րդ և ամենաերիտասարդ նախագահն է։ Այս տարվա մայիսի 7-ին անցկացված ընտրություններին նա կարողացավ ավելի շատ ձայն հավաքել իր սկզբունքային մրցակից Մարին Լե Պենից։