ՀՀ արտաքին գործերի նախարարը հանդիպում է ունեցել Իսրայելի վարչապետի հետ (տեսանյութ)
Նոյեմբերի 7-ին պաշտոնական այցով Իսրայելում գտնվող ՀՀ արտգործնախարար Էդվարդ Նալբանդյանը հանդիպում է ունեցել Իսրայելի վարչապետ և արտաքին գործերի նախարար Բենիամին Նեթանյահուի հետ։ Այս մասին տեղեկացնում է ՀՀ արտաքին գործերի նախարարության մամուլի ծառայությունը։
Աղբյուրի փոխանցմամբ՝ հանդիպումը մեկնարկել է պատվիրակությունների ներկայությամբ, այնուհետև նախարարներն առանձնազույց են ունեցել։
Իսրայելի վարչապետը կարևորել է ՀՀ ԱԳ նախարարի այցը՝ նշելով, որ իրենք պատրաստակամ են ընդլայնել Հայաստանի հետ հարաբերությունները։
Շնորհակալություն հայտնելով այցելության հրավերի և ընդունելության համար՝ նախարար Նալբանդյանը նշել է, որ վերջին շրջանում հայ-իսրայելական շփումներում նկատվում է ակտիվացում և համոզունք է հայտնել, որ հիմնվելով երկու ժողովուրդների բարեկամական պատմական հարուստ ավանդույթների վրա, համատեղ ջանքերի շնորհիվ Հայաստանի և Իսրայելի հարաբերությունները նոր լիցք կստանան։
Հանդիպմանը հանգամանալից քննարկում է տեղի ունեցել հայ-իսրայելական երկկողմ օրակարգի հարցերի, միջազգային կառույցներում համագործակցության շուրջ։ Անդրադարձ է կատարվել տարածաշրջանային և միջազգային հրատապ խնդիրներին, մերձավորարևելյան զարգացումներին:
Իսրայելի վարչապետը և Հայաստանի ԱԳ նախարարը անդրադարձել են նաև Երուսաղեմում հայկական հարուստ պատմամշակութային ժառանգությանը։