Իսպանիայի Գերագույն դատարանը կալանավորել է Կատալոնիայի խորհրդարանի խոսնակին

Իսպանիայի Գերագույն դատարանը որոշել է մինչև անկախության հռչակման գործով հետաքննության ավարտը կալանավորել Կատալոնիայի խորհրդարանի խոսնակ Կարմա Ֆորկադելին՝ 150  հազար եվրո գրավի դիմաց ազատ արձակվելու իրավունքով։ Այս մասին ասվում է դատական հրամանագրում։

Նշվում է, որ խորհրդարանի նախկին անդամներ Լուիս Կորոմինասը, Լուիս Գինոն, Աննա Սիմոն, Ռամոնա Բարուֆետը պետք է 25 հազար եվրո տուգանք վճարեն, «քանի դեռ ազատության մեջ են»։ Գրավը վճարելու դեպքում նրանք պետք է ամեն շաբաթ ներկայանան դատարան։ Նրանք նաև չեն կարող նաև լքել երկիրը, քանի որ անձնագրերը պետք է հանձնեն պետությանը։

Հիշեցնենք, որ Իսպանիայի դատախազությունը մեղադրանք էր առաջադրել կատալոնացի վեց քաղաքական գործիչների նկատմամբ ապստամբության կազմակերպման և պետական միջոցների յուրացման հատկանիշներով։ Այս հանցագործությունների համար նախատեսվում է մինչև 48 տարվա ազատազրկում։

Հոկտեմբերի 27-ին Կատալոնիայի խորհրդարանի՝ անկախության հռչակումից հետո Իսպանիայի Սենատը հավանության է արժանացրել սահմանադրության 155-րդ հոդվածը կիրառելու մասին կառավարության դիմումը։ Այս հոդվածը թույլ է տալիս սահմանափակել Կատալոնիայի ինքնավարությունը։

Ավելի ուշ Իսպանիայի վարչապետ Մարիանո Ռախոյը հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։