Սիրիական հակամարտության կարգավորման հարցով բանակցությունները պետք է ընթանան միայն Ժնևում․ Պետքարտուղարություն

ԱՄՆ-ը կարծում է, որ սիրիական հակամարտության կարգավորման հարցով քաղաքական բանակցութունները պետք է ընթանան միայն ժնևյան գործընթացի շրջանակներում։ Այս մասին հայտարարել է պետքարտուղարության ներկայացուցիչը։

«Քաղաքական բանակցությունները պետք է ընթանան Ժնևում՝ համաձայն ժնևյան գործընթացի», - ԱՄՆ-ի արտաքին քաղաքական գերատեսչության ներկայացուցչի խոսքերը մեջբերում է Ռիա Նովոստի-ն։

Նրա խոսքով՝ Աստանայում ընթացող բանակցությունները մեծ մասամբ վերաբերում են կրակի դադարեցմանը և անվտանգության գոտիներին, սակայն որոշ քաղաքական ասպեկտների, այնուամենայնիվ, անդրադարձ կատարվել է։ Պետքարտուղարության ներկայացուցիչը հիշեցրել է նաև, որ ԱՄՆ-ը Աստանայի գործընթացի մասնակից չէ, սակայն պահպանում է դիտորդի կարգավիճակը։

Անդրադառնալով ժնևյան գործընթացին՝ ամերիկացի դիվանագետը նշել է, որ Վաշինգտոնն այդ հարցում նախապայմաններ չի դնում և գործողությունների լայն հնարավորություն է տալիս ՄԱԿ-ի հատուկ բանագնաց Ստեֆան Դե Միստուրային։

Սիրիական հակամարտությունն սկսվել է 2011 թվականին։ ՄԱԿ-ի տվյալներով՝ այդ ժամանակվանից մինչև օրս համակարտության զոհ է դարձել շուրջ 220 հազար մարդ։ Հակամարտության կարգավորման հարցով բանակցություններն ընթանում են երկու հարթակներում՝ Ժնևում և Աստանայում։