Էդվարդ Նալբանդյանը հանդիպում է ունեցել Սերգեյ Լավրովի հետ (տեսանյութ)
Նոյեբերի 21-ին ՀՀ արտաքին գործերի նախարար Էդվարդ Նալբանդյանը հանդիպում է ունեցել ՌԴ արտգոծնախարար Սերգեյ Լավրովի հետ, որը պաշտոնական այցով ժամանել էր Երևան։ Այս մասին տեղեկացնում է ՀՀ արտգործնախարարության մամուլի ծառայությունը։
Աղբյուրի փոխանցմամբ՝ հանդիպումը մեկնարկել է առանձնազրույցով, ապա շարունակվել է պատվիրակությունների մասնակցությամբ։
Էդվարդ Նալանդյանը, ողջունելով հյուրին, կարևորել է վերջինիս այցը և նշել, որ այն տեղի է ունենում երկու երկրների համար խորհրդանշական՝ դիվանագիտական հարաբերությունների հաստատման 25-ամյա հոբելյանական տարում։
Շնորհակալություն հայտնելով ջերմ ընդունելության համար՝ Սերգեյ Լավրովն ընդգծել է, որ դիվանագիտական հարաբերությունների հաստատումից ի վեր հայ-ռուսական բարեկամությունը լուրջ առաջընթաց է գրանցել։
Հանդիպման ընթացքում քննարկված մի շարք թեմաների թվում, թերևս, ամենակարևոր տեղն զբաղեցրել է ղարաբաղյան հակամարտության կարգավորման հարցը։ Հայաստանի և Ռուսաստանի արտգործնախարարներն անդրադարձել են Մոսկվայում ԵԱՀԿ Մինսկի խմբի համանախագահների հետ Հայաստանի և Ադրբեջանի ԱԳ նախարարների հանդիպումներին:
Էդվարդ Նալբանդյանն ու Սերգեյ Լավրովը մտքեր են փոխանակել նաև մի շարք հրատապ տարածաշրջանային և միջազգային խնդիրների շուրջ։ Անդրադարձ է կատարվել Մերձավոր Արևելքում տիրող իրավիճակին, սիրիական ճգնաժամի հանգուցալուծման ջանքերին:
Ինչպես նշում է ՀՀ ԱԳՆ-ի մամուլի ծառայությունը, հանդիպումից հետո նախարարները ստորագրել են Հայաստանի և Ռուսաստանի արտգործնախարարությունների միջև խորհրդակցությունների 2017-2018 թ․թ. ծրագիրը։