Նվազել է Կատալոնիա այցելող զբոսաշրջիկների թիվը
Ստեղծված քաղաքական ճգնաժամի պատճառով այս տարվա հոկտեմբերին նախորդ տարվա նույն ժամանակահատվածի համեմատ 4,7%-ով պակասել է Կատալոնիա այցելող արտասահմանցի զբոսաշրջիկների թիվը։ Այս մասին հաղորդում է Frontur կազմակերպությունը, որն զբաղվում է Իսպանիայում արտասահմանցի զբոսաշրջիկների այցելությունների ուսումնասիրությամբ։
Նշում է, որ նախորդ ամբողջ ամսվա ընթացքում արտասահմանից Կատալոնիա է ժամանել մոտ 1,5 միլիոն զբոսաշրջիկ, որոնց մեծ մասը՝ Մեծ Բրիտանիայից և Ֆրանսիայից։
Նույն ժամանակահատվածում Իսպանիա է այցելել մոտ 7,3 միլիոն զբոսաշրջիկ։ Այս ցուցանիշը 1,8%-ով գերազանցում է 2016 թ․ հոկտեմբեր ամսվա ցուցանիշին։
Ուսումնասիրությունը ցույց է տալիս, որ 2017 թ․ առաջին տասը ամիսների ընթացքում Իսպանիա է այցելել 73,4 միլիոն զբոսաշրջիկ։ Նախորդ տարվա նույն ժամանակահատվածի համեմատ ցուցանիշն աճել է 9,2%-ով։
Նշվում է, որ ամբողջ 2016 թ․ ընթացքում Իսպանիա են այցելել ռեկորդային թվով զբոսաշրջիկներ (75,6 միլիոն մարդ)՝ 10%-ով ավելի, քան 2015 թվականին։