ԱՄՆ-ի հակառուսական պատժամիջոցները վնասում են նաև Բեռլինին․ Գերմանիայի ԱԳ նախարար
ԱՄՆ-ի նոր հակառուսական պատժամիջոցները վնաս են հասցնում նաև Բեռլինին՝ տարածվելով գազատարների նախագծերի վրա, որոնց մասնակցում են նաև գերմանացիները։ Այս մասին արտաքին քաղաքականությանը նվիրված համաժողովի ժամանակ հայտարարել է Գերմանիայի արտաքին գործերի նախարար Սիգմար Գաբրիելը։
Նա կոչ է արել վերանայել ԱՄՆ-ի նկատմամբ Գերմանիայի և ողջ Եվրոպայի քաղաքականությունը՝ ավելի վստահ պաշտպանելով սեփական շահերը։
Գաբրիելի խոսքով՝ Թրամփի օրոք Միացյալ Նահանգներն ավելի թույլ է կատարում «համաշխարհային նշանակության քաղաքական ուժի դերը»՝ Գերմանիային ընդունելով որպես «մի դաշնակից բազմաթիվ դաշնակիցների մեջ»։
ԱԳ նախարարը նշել է, որ Գերմանիան ապագայում պետք է ավելի վստահորեն ներկայացնի իր շահերը՝ նշելով այն «կարմիր գծերը, որոնք դաշնակիցներին թույլ չի տրվում հատել»։
Հիշեցնենք, որ այդ տարվա օգոստոսի սկզբին Թրամփն ընդունել է մի որոշում, որով նախագահին թույլատրվում է պատժամիջոցներ սահմանել այն անձանց նկատմամբ, որոնք ցանկանում են ռուսական գազամուղերի ծրագրերում կատարել տարեկան ավելի քան հինգ միլիոն դոլարի ներդրում։ Ընդունված փաստաթղթում նշվում է նաև, որ ԱՄՆ-ը շարունակելու է խոչընդոտել «Հյուսիսային հոսք-2» ծրագրի իրագործմանը։