ԱՄՆ-ում արդարացրել են ձերբակալության ժամանակ անզեն մարդուն գնդակահարած ոստիկանին (տեսանյութ)

ԱՄՆ-ի Արիզոնա նահանգի Մեսա քաղաքում դատարանն արդարացրել է ոստիկանին, որը հասարակական կարգը խախտած անզեն մարդուն ձերբակալելու ժամանակ սպանել է վերջինիս։ Ինչպես հայտնում է CBS News-ը, դեպքը տեղի է ունեցել նախորդ տարվա հունվարին Ֆինիքսի արվարձաններից մեկի հյուրանոցում։

Ոստիկան Ֆիլիպ Բրեիլսֆորդի համազգեստին ամրակցված տեսախցիկի նկարահանած տեսանյութում երևում է, թե ինչպես է կասկածյալ Դանիել Շեյվերը ենթարկվում ոստիկանի հրահանգներին։ Դա, սակայն, չի փրկում վերջինիս։   

Ոստիկանը հրամայում է ձեռքերը պարզել վեր, ապա ծնկի գալ և սողալով մոտենալ իրեն։ Շեյվերը հերթականությամբ կատարում է հրահանգները, սակայն երբ փորձում է սողալով մոտենալ ոստիկանին, վերջինս կրակ է բացում և գնդակահարում է անզեն մարդուն։

Դատավարության ժամանակ Ֆիլիպ Բրեիլսֆորդը նշել է, որ Շեյվերը սողալով փորձել է հասնել հատակին եղած զենքին, և ինքը, զգալով վտանգը, կրակել է։ Հետաքննությունը, սակայն, ցույց է տվել, որ այնտեղ զենք չի եղել։

«Այս դատավարությանը հաղթողներ չկան։ Բրեիլսֆորդը պետք է որոշում կայացներ վայրկյանների ընթացում։ Նա սովորել է, որ, եթե կասկածյալը փորձում է մոտենալ զենքին, ապա պետք է անմիջապես արձագանքել։ Նա չի ցանկացել վնասել պարոն Շեյվերին, սակայն հանգամանքներն այնպես են դասավորվել, որ Բրեիլսֆորդը վտանգ է զգացել։ Դա կյանքի և մահվան հարց էր», - իր վճռական ճառում ասել է դատավորը։

Ֆիլիպ Բրեիլսֆորդը երկու տարի ոստիկանությունում ծառայելուց հետո հեռացվել է համակարգից անբավարար վարքի և ոստիկանության բաժանմունքում բռնություն կիրառելու համար։