Իսպանիայի վարչապետը խոստացել է երկխոսություն սկսել Կատալոնիայի նոր իշխանությունների հետ
Իսպանիայի վարչապետ Մարիանո Ռախոյը պատրաստվում է բանակցություններ սկսել Կատալոնիայի նոր կառավարության հետ, որը պետք է ձևավորվի դեկտեմբերի 21-ին կայանալիք ընտրությունների արդյունքում։ Այս մասին նա հայտարարել է պատգամավորների հետ հանդիպման ժամանակ։
«Հույս ունեմ, որ շուտով ամեն ինչ կկարգավորվի, և մենք կկարողանանք սկսել քաղաքակիրթ երկխոսություն», - հայտարարել է Իսպանիայի վարչապետը։
Նրա խոսքով՝ կատալոնական կառավարության հետ հնարավոր է բանակցություններ վարել միայն համակեցության կանոնների պահպանման պարագայում։ Նա հիշեցրել է, որ ինքնավարության նախորդ կառավարությունը խախտել է այդ կանոնը՝ առանց Սահմանադրական դատարանի արգելքը հաշվի առնելու անկախության հանրաքվե անցկացնելով և միակողմանի անկախություն հռչակելով։
«Որոշ ղեկավարներ կարծում էին, որ իրենց մոտ սահմաադրությունը չի գործում․ հորինեցին նոր օրենսդրություն և ընդդիմությանը թույլ չտվեցին արտահայտվել», - շարունակել է Ռախոյը՝ հավելելով, որ հնարավոր չէ երկխոսություն վարել մի մարդու հետ, որը «հանրաքվեին հարցը դնում է հետևյալ կերպ՝ «այո, կամ՝ այո»»։
Հիշեցնենք, որ հոկտեմբերի 27-ին Կատալոնիայի խորհրդարանի՝ անկախության հռչակումից հետո Իսպանիայի Սենատը հավանության է արժանացրել սահմանադրության 155-րդ հոդվածը կիրառելու մասին կառավարության դիմումը։ Այս հոդվածը թույլ է տալիս սահմանափակել Կատալոնիայի ինքնավարությունը։
Ավելի ուշ Իսպանիայի վարչապետ Մարիանո Ռախոյը հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։