Կատալոնիայում անկախությանը կողմ ուժերը ստացել են պատգամավորական մանդատների մեծամասնությունը
Կատալոնիայի անկախությանը կողմ հանդես եկող քաղաքական ուժերը խորհրդարանական ընտրություններում ստանում են ձայների բացարձակ մեծամասնությունը քվեաթերթիկների 95%-ի հաշվարկից հետո։ Այս մասին տեղեկացնում են ինքնավարության իշխանական աղբյուրները։
ՏԱՍՍ-ի փոխանցմամբ՝ Իսպանիայից անկախանալուն կողմ հանդես եկող երեք կուսակցություններին պատգամավորական 135 մանդատից բաժին է հասել 70-ը։ Մասնավորապես՝ Կատալոնիայի նախկին վարչապետ Կարլոս Պուչդեմոնի ղեկավարած «Միասին հանուն Կատալոնիայի» կոալիցիան ստացել է 34 մանդատ, «Կատալոնիայի ձախ հանրապետականներ» կուսակցությունը՝ 32, իսկ «Ազգային միասնության թեկնածուներ» կուսակցությունը՝ 4 մանդատ։
«Քաղաքացիներ» կուսակցությունը, որը կողմ է երկրի միասնությանը, ստացել է 36 պատգամավորական մանդատ, սոցիալիստներն ստացել են 17, իսկ Կատալոնիայի ազգային կուսակցությունն ստացել է 4 մանդատ։
Հիշեցնենք, որ դեկտեմբերի 21-ին Կատալոնիայում անցկացվել են արտահերթ խորհրդարանական ընտրություններ, որին մասնակցել են ռեկորդային թվով քաղաքացիներ՝ ընտրելու իրավունք ունեցողների 81%-ը։
Ընտրությունների գլխավոր անակնկալը Կատալոնիայի նախկին ղեկավար Կարլոս Պուչդեմոնի գլխավորած կոալիցիայի գրանցած բարձր արդյունքն էր։
Պուչդեմոնը ներկա պահին Բելգիայում է։ Դատախազությունը նրան և նրա համախոհներին մեղադրում է ապստամբություն կազմակերպելու մեջ։ Իսպանիա վերադառնալու պարագայում նա կարող է ձերբակալվել, քանի որ դատարանը միջազգային հետախուզում է հայտարարել նրա նկատմամբ։ Պուչդեմոնը նախկինում հայտարարել էր, որ արտահերթ ընտրություններին հնարավոր հաղթանակի դեպքում կարող է վերադառնալ Կատալոնիա։