Իսրայելի ռազմաօդային ուժերը ավիահարվածներ են հասցրել Դամասկոսի մոտակայքում գտնվող բնակավայրերից մեկին․ Սիրիայի ՊՆ

Հունվարի 9-ի առավոտյան Իսրայելի ռազմաօդային ուժերը մի քանի ավիահարված են հասցրել Դամասկոսի մոտակայքում գտնվող Էլ Քաթիֆ բնակավայրի ռազմական օբյեկտներին։ Այս մասին ասվում է Սիրիայի պաշտպանության նախարարության տարածած հաղորդագրության մեջ։

Նշվում է, որ իսրայելական ուժերը հարվածները հասցրել են «երկիր-երկիր» տեսակի հրթիռներով և ռազմական ինքնաթիռներով։ Սիրիական կողմի հավաստմամբ՝ հաջողվել է խոցել հրթիռներից մի քանիսը։ Խոցվել է նաև մեկ ինքնաթիռ, որի ճակատագիրը դեռ անհայտ է։

Իսրայելական Haaretz թերթն, իր հերթին, հղում կատարելով սիրիական ընդդիմության աղբյուրներին, պնդում է, որ հարվածների թիրախը եղել է տեղի ռազմամթերքի պահեստը։ Իսրայելի պաշտպանության նախարարության մամուլի ծառայությունը, սակայն, չի մեկնաբանել ավիարվածների մասին լուրերը։

Հիշեցնենք, որ նախորդ տարվա դեկտեմբերի 2-ին Իսրայելի ռազմաօդային ուժերը «երկիր-երկիր» տեսակի հրթիռներով հարվածներ էին հասցրել սիրիական Էլ Քիսվա քաղաքին, որը գտնվում է Դամասկոսի հարավարևելքում։ Al Ekhbariya հեռուստաալիքի պնդմամբ՝ հրթիռներից մեկը խոցել էր տեղի դիրքերից մեկը՝ սիրիական կողմին հասցնելով նյութական խոշոր չափի վնաս։