Ռուսաստանի Պերմ քաղաքում զինված հանցագործները ներխուժել են դպրոց և դանակահարել աշակերտներին

Արտակարգ դեպք է տեղի ունեցել Ռուսաստանի Պերմ քաղաքում։ Դանակներով զինված երկու դիմակավորված տղամարդ ներխուժել է տեղի դպրոցերից մեկը՝ հարձակվելով աշակերտների և ուսուցիչների վրա։ Հարձակման հետևանքով վնասվածքներ է ստացել ութ աշակերտ և մեկ ուսուցիչ։ Այս մասին հայտնում է Ռիա Նովոստի-ն՝ հղում կատարելով Պերմի շրջանի տարածքային անվտանգության  նախարարության հաղորդագրությանը։

Նախարարության մամուլի քարտուղար Ելենա Դուբինինայի խոսքով՝ արդեն դեպքի վայր են մեկնել Պերմի շրջանի նահանգապետ Մաքսիմ Րեշետնիկովը և տարածքային անվտանգության նախարարության մի շարք աշխատակիցներ։

Նշվում է, որ դեպքը տեղի է ունեցել Մոտովիլիխինսկի թաղամասի №127 դպրոցում տեղի ժամանակով՝ առավոտյան 08:17-ին։

«Դիմակավորված երկու հանցագործներ հարձակվել են դպրոցի ուսուցիչներից մեկի և աշակերտների վրա։ Զինված հարձակման հետևանքով վիրավորվել է 9 հոգի՝ 8 աշակերտ և մեկ ուսուցիչ», - ասել է նախարարության մամուլի խոսնակը։

Դեպքի վայր են ժամանել ոստիկանության և շտապօգնության ծառայության աշխատակիցները։

Կասկածյալներն արդեն ձերբակալվել են։