Թուրքիան պատրաստվում է զանգվածային ավիահարվածներ հասցնել Սիրիայում քրդերի դիրքերին․ Haberturk
Թուրքիայի Զինած ուժերի՝ Աֆրինում ցամաքային գործողությանը կնախորդեն քրդական «Ազգային ինքնապաշպանության ջոկատներ» զորամիավորման (YPG) դիրքերին շուրջ 150 զանգվածային ավիահարվածներ։ Այս մասին գրում է թուրքական Haberturk լրատվականը։
Աղբյուրի փոխանցմամբ՝ թուրքական հատուկ ծառայությունները նախորդ տարվա հոկտեմբերի 13-ից ուշադրության կենտրոնում են պահում Աֆրինը և YPG-ի վերահսկողության տակ գտնվող մյուս տարածքները՝ օգտագործելով անօդաչու սարքեր։
«Հունվարի 16-ին հայտնաբերվել է 149 թիրախ, որոնց ուղղությամբ ավիահարվածներ կհասցվեն գործողության մեկնարկից առաջ։ Կխոցվեն ոչ միայն YPG-ի անշարժ օբյեկտները, այլ նաև՝ տրանսպորտային հանգույցները», - գրում է Haberturk-ը։
Նշվում է, որ գործողոթյան առաջին փուլը կտևի 6 օր, որի ընթացքում ավիացիային զուգընթաց ակտիվորեն կգործի նաև սահմանային շրջաններում տեղակայված հրետանին։
Haberturk-ն ընդգծում է նաև, որ Աֆրինի վերջնական «մաքրման» համար կարող է պահանջվել թուրքական բանակի հատուկ նշանակության ջոկատների մասնակցությունը։
Նշենք, որ օրեր առաջ Թուրքիան Սիրիայի հետ սահմանային շրջաններ էր փոխադրել մեծ քանակությամբ զրահատեխնիկա և հրետանի։ Հարկ է նշել նաև, որ Աֆրինը երեք կողմից (հյուսիսից, արևելքից և արևմուտքից, - խմբ․) շրջափակված է թուրքական սահմաններով։ Զանգվածային գրոհների պարագայում քուրդ զինյալները կարող են նահանջել դեպի Դամասկոսի տիրապետության տակ գտնվող տարածքներ։
Օրեր առաջ պարզ էր դաձել, որ ԱՄՆ-ի գլխավորած միջազգային կոալիցիան Սիրիայում ստեղծում է «Սահմանային անվտանգության ուժեր» անվանմամբ զորամիավորում, որպեսզի վերջինս ապահովի իր տիրապետության տակ գտնվող տարածքների անվտանգությունը։ Նպատակ կա վերապատրաստել մոտ 30 հազար մարդու, որոնցից 15 հազարը կլինեն քրդական «Սիրիայի դեմոկրատական ուժեր» (SDF-Syrian Democratic Forces) զորամիավորման անդամներ։
Հատկանշական է, որ այս զորամիավորումը գործելու է հենց թուրքական սահմանի մոտ։ Այս կապակցությամբ իր վրդովմունքն էր հայտնել Թուրքիայի ԱԳՆ-ը։ Թուրքիայի փոխվարչապետ Բեքիր Բոզդաղը հայտարարել էր, որ «ԱՄՆ-ը խաղում է կրակի հետ»։ Նախագահ Էրդողանն, իր հերթին, սպառնացել էր դեռ չստեղծված ոչնչացնել այդ նոր զորամիավորումը։
«Սիրիայի դեմոկրատական ուժեր» զորամիավորումը հիմնականում բաղկացած է սիրիացի քրդերից, ինչպես նաև արաբ որոշ ռազմագերիներից Այս զորամիավորումն ստեղծվել է 2015 թ․ ԱՄՆ-ի ակտիվ աջակցությամբ։ Ինչպես հայտարարվում էր, այն «անհրաժեշտ էր Իսլամական պետության դեմ պայքարում»։ Խմբավորումն իր զինամթերքն ստանում էր ԱՄՆ-ի գլխավորած կոալիցիայից։
http://www.haberturk.com/son-dakika-haberi-afrin-operasyonu-ne-zaman-bas...