ԱՄՆ-ի «կրեմլյան զեկույցը» Ռուսաստանի նախագահական ընտրությունների վրա ազդեցություն ունենալու ակնհայտ փորձ է․ Պեսկով
ՌԴ նախագահի մամուլի խոսնակ Դմիտրի Պեսկովը կարծում է, որ ԱՄՆ-ի, այսպես կոչված, «կրեմլյան զեկույցը» Ռուսաստանի նախագահի ընտրություններին ազդելու փորձ է։ Այս մասին գրում է ՏԱՍՍ-ը։
«Մենք իսկապես կարծում ենք, որ դա ընտրություններին որոշակի ազդեցություն ունենալու ուղիղ և ակնհայտ փորձ է», - ասել է Պեսկովը՝ հույս հայտնելով, որ ի վերջո ոչ մի ազդեցություն չի լինի։
«Համոզված ենք, որ ոչ մի ազդեցություն էլ չի լինի», - ընդգծել էր նա։
Պեսկովի կարծիքով՝ զեկույցի հրապարակումը «ոչինչ չի նշանակում․ դա չի համարվում պատժամիջոցների հերթական ալիք»։
«Բացի այդ, անհրաժեշտ է հետևել, թե ինչ գործողություններ կլինեն զեկույցի հրապարակումից հետո։ Հենց այս գործողությունները Մոսկվայում մանրակրկտորեն կվերլուծվեն, որպեսզի հնարավոր լավագույն կերպով պաշտպանվեն ռուսական ընկերությունների շահերը», - ասել է Կրեմլի մամլո քարտուղարը։
Ինչպես հաղորդում է ՏԱՍՍ-ը, սպասվում է, որ այսօր՝ հունվարի 29-ին, ամերիկյան վարչակազմը Կոնգրեսին կներկայացնի այսպես կոչված «կրեմլյան զեկույցը»՝ պաշտոնատար անձանց, քաղաքական գործիչների և խոշոր ձեռնարկատերերի մի ցուցակ՝ ռուսական իշխանությունների հետ նրանց ունեցած առնչությունների վերլուծությամբ։ Ենթադրվում է, որ հենց այս ցուցակի վրա էլ հիմնված կլինի Վաշինգտոնի հակառուսական նոր պատժամիջոցները։