Թուրքիայի ռազմաօդային ուժերը ռմբակոծում են Սիրիայի հյուսիսը
Թուքիայի ռազմաօդային ուժերը զանգվածային ավիահարվածներ են հասցնում քրդական «Ազգային ինքնապաշտպանական ջոկատներ» (YPG) զորամիավորման՝ Աֆրինում գտնվող դիրքերին։ Ինչպես հայտնում է քրդական Firat գործակալությունը, օդային հարձակումները կատարվել են սահմանամերձ Ջանդարիս և Բիլբիլ շրջանների վրա։
Աղբյուրի փոխանցմամբ՝ ավիահարվածների հետևանքով զոհվել է մեկ ընտանիքի միանգամից 13 անդամ։ Կան նաև խաղաղ բնակչության շրջանում գրանցված այլ վիրավորներ։
Աֆրինի շրջանի առողջապահության վարչության ղեկավարը Firat-ի հետ զրույցում հայտնել է, որ Սիրիայի հյուսիսում թուրքական կողմի ավելի վաղ կատարած ավիահարվածները 86 խաղաղ բնակչի կյանք են խլել։ Վիրավորվել է մոտ 200 մարդ։
Թուրքական կողմն իր հերթին հայտնում է, որ «Ձիթենու ճյուղ» ռազմական գործողության ընթացքում «Աֆրինում ոչնչացվել է 597 ահաբեկիչ»։
Հիշեցնենք, որ հունվարի 20-ին Թուրքիայի Զինված ուժերն սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։