Այսպես կոչված «կրեմլյան զեկույցը» ԱՄՆ-ի ներքին խնդիրները թաքցնելու փորձ է․ ՌԴ Անվտանգության խորհրդի քարտուղար
Այսպես կոչված «կրեմլյան զեկույցը» ԱՄՆ-ի իշխանությունների՝ երկրի ներքին խնդիրներն արտաքին սպառնալիքի տակ թաքցնելու հերթական փորձն է։ Այս մասին լրագրողների հետ զրույցում հայտարարել է Ռուսաստանի Դաշնության Անվտանգության խորհրդի քարտուղար Նիկոլայ Պատրուշևը։
«Ռուսաստանը և Չինաստանը որպես արտաքին վտանգ ներկայացնելու ամերիկյան նոր արտաքին քաղաքականությունն ամենից առաջ ուղղված է հասարակ ամերիկացիների ուշադրությունը երկրի ներքին բարդ իրավիճակից՝ տնտեսական և սոցիալական խնդիրներից շեղելուն», - ասել է Պատրուշևը։
Նրա խոսքով՝ Վաշինգտոնի այս պահվածքը խոսում է այն մասին, որ ամերիկյան իշխանությունները չեն կարողանում արդյունավետ կերպով լուծել երկրի ներքին խնդիրները։
ՌԴ Անվտանգության խորհրդի քարտուղարը վստահ է, որ հենց այս նպատակն է դրված եղել Սպիտակ տան առջև ազգային անվտանգության նոր ռազմավարության մշակման ժամանակ։
«Ընդ որում, եթե ազգային անվտանգության ռազմավարության մեջ ԱՄՆ-ի գլխավոր սպառնալիք է ներկայացվում ահաբեկչությունը, Իսլամական պետությունը, հետո Ռուսաստանը, Չինաստանը, Հյուսիսային Կորեան և Իրանը, ապա հունվարյան ռազմավարության մեջ սպառնալիքների առաջին շարքում ոչ թե ահաբեկչությունն է, այլ հենց Ռուսաստանը և Չինաստանը», - ընդգծել է Պատրուշևը։
Հիշեցնենք, որ ավելի վաղ ԱՄՆ-ի ֆինանսների նախարարությունը հրապարակել էր այսպես կոչված «կրեմլյան զեկույցը»՝ Ռուսաստանի Դաշնության պետական պաշտոնյաների և խոշոր ձեռնարկատերերի 210 հոգուց բաղկացած ցուցակ։ Այս ցուցակում ընդգրկված անձինք կարող են հայտնվել Վաշինգտոնի սահմանափակող նոր միջոցների տակ։