Թուրքական բնակավայրերը հրթիռակոծության են ենթարկվել Սիրիայի տարածքից
Սիրիական Աֆրինի շրջանից արձակված հրթիռը պայթել է թուրքական սահմանից ոչ հեռու։ Ինչպես հայտնում է NTV հեռուստաալիքը, տեղի ունեցածի հետևանքով զոհեր չկան։
Աղբյուրի փոխանցմամբ՝ հրթիռներն ընկել են թուրքական Քիլիս և Ռեյհանլը բնակավայրերի մոտ։ Քիլիսում երեք հրթիռների պայթյունի հետևանքով փլվել է մեկ շենք, իսկ Ռեյհանլըում հրթիռի պայթյունի հետևանքով վիրավորվել է մեկ մարդ։
Թուրքիայի Զինված ուժերի համապատասխան ստորաբաժանումները պարզել են հրթիռների արձակման վայրը և պատասխան հարված հասցրել այդ շրջանին։
Վերջին ժամանակներս բավական ակտիվացել են Սիրիայի տարածքից թուրքական բնակավայրերի ուղղությամբ հրթիռային հարվածները։ Սա կապված է սիրիական Աֆրինում թուրքական զինված ուժերի սկսած ռազմական գործողությամբ։
Հիշեցնենք, որ հունվարի 20-ին Թուրքիայի Զինված ուժերը սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։
Գործողությունը սկսելուց երկու օր անց Էրդողանը հայտարարել է, որ թուրքական զորքերը կլքեն Սիրիայի տարածքը միայն վերջնական նպատակին հասնելուց հետո։ Նա նշել է նաև, որ իրենց գործողություններն «ուղղված են ոչ թե քրդերի, այլ ահաբեկիչների միջանցք ստեղծելու դեմ»։