ԱՄՆ-ը ՄԱԿ-ին 350 հազար դոլար կտրամադրի Սիրիայում կատարված հանցագործությունների հետաքննության համար

ԱՄՆ-ը 350 հազար դոլար կտրամադրի Սիրիայում հանցագործությունների բացահայտման մեխանիզմի ֆինանսավորմանը, որն ստեղծվել է ըստ ՄԱԿ-ի Գլխավոր Ասամբլեայի 2016 թ․ ընդունած բանաձևի։ Այս մասին գրում է ՏԱՍՍ-ը՝ հղում կատարելով ՄԱԿ-ում ԱՄՆ մշտական ներկայացուցչության տարածած հաղորդագրությանը։

«Միացյալ Նահանգները 350 հազար դոլար կտրամադրի Սիրիայում կատարված հանցագործությունների բացահայտման անկախ և անաչառ հետաքննության համար։ Հուսով ենք՝ այս մեխանիզմը կօգնի բացահայտել Ասադի վայրի ռեժիմի կատարած հանցագործությունները, այդ թվում՝ քիմիական զենքի կիրառման դեպքը», - ասվում է ամերիկյան ներկայացուցչության թվիթերյան էջում տեղ գտած հաղորդագրության մեջ։

Հիշեցնենք, որ 2016 թ․ դեկտեմբերին ՄԱԿ-ի Գլխավոր Ասամբլեան ընդունել էր բանաձև, որով նախատեսվում էր ստեղծել Սիրիայում հակամարտության ընթացքում կատարված հանցագործությունների բացահայտման «անաչառ և անկախ մեխանիզմ»։ Մեխանիզմի ստեղծմանը կողմ էր արտահայտվել 105 պետություն, այդ թվում նաև՝ Արևմուտքի ներկայացուցիչներ։ Դեմ էին արտահայտվել 15 պետություն, այդ թվում՝ Ռուսաստանը, Իրանը, Սիրիան, Չինաստանը և այլն։

Բանաձևի ընդունումից հետո ՄԱԿ-ում Ռուսաստանի այդ ժամանակվա ներկայացուցիչ Վիտալի Չուրկինը հայտարարել էր, որ Ասամբլեան իրավասու չէ նման մեխանիզմ ստեղծելու։ Դիվանագետն ընդգծել էր, որ, քանի որ «այդ մեխանիզմը գործելու է կամավոր ֆինանսավորման միջոցով, հետևաբար այն պետք է գրանցի այնպիսի արդյունքներ, որոնք բավարարում են գումար տվողին»։ Չուրկինի խոսքով՝ հանցագործությունների բացահայտման մեխանիզմն «անկասկած կրելու էր «հակաասադական» բնույթ»։