Իտալիայում անհայտ անձը կրակ է բացել անցորդների ուղղությամբ

Իտալիայի Մաչերատա քաղաքում անհայտ անձը կրակ է բացել անցորդների ուղղությամբ, ինչի հետևանքով տուժել է 7 քաղաքացի։ Այս մասին տեղեկացնում են իտալական լրատվամիջոցները։

La Repubblica թերթի փոխանցմամբ կրակն արձակվել է դեպքի վայրում գտնվող մեքենաներից մեկից, որն այդ պահին ընթանալիս է եղել։

Corriere della Sera-ն գրում է, որ կրակոցներին նախորդել է վեճը, որը ծագել է «ոչ եվրոպական արտաքինով մի քանի արտասահմանցիների միջև»։

Վարկած է շրջանառվում, որ զինված անձինք հաշիվներ են պարզել միանգամից մի քանի փողոցներում։

Լրատվամիջոցները հաղորդում են 4-ից 7 վիրավորների մասին, որոնցից մի քանիսի վիճակը ծայրահեղ ծանր է։

«Քաղաքապետ Ռոմանո Կարանչինի կոչ է անում քաղաքի բնակիչներին դուրս չգալ տներից, աշխատանքի վայրերից, դպրոցներից, քանի որ քաղաքում շրջում է զինված խումբ։ Անվտանգության նկատառումներից ելնելով՝ կանգնեցվել է նաև քաղաքային տրանսպորտի գործունեությունը», - ասվում է Մաչերատայի քաղաքային իշխանությունների տարածած հաղորդագրության մեջ։

Ավելի ուշ իրավապահներին հաջողվել է ձերբակալել կասկածյալին, որը 28-ամյա ոմն Լուկա Տրայանին է։ Նշվում է, որ ձերբակալության ժամանակ նա ձեռքը բարձրացրել է վեր՝ որպես ֆաշիստական ողջույնի նշան։