Վենեսուելայում պարտքի պատճառով սպանել և կերել են անչափահաս տղայի

Վենեսուելայի Կարաբոբո նահանգում հարևանների միջև վեճն ավարտվել է ողբերգությամբ։ Հայր և որդի երկու դոլար պարտքի համար վեճի են բռնվել իրենց 17-ամյա հարևանի հետ, այնուհետև սպանել վերջինիս և կերել նրա դիակի մի մասը։ Այս մասին գրում է Ռիա Նովոստի-ն՝ հղում կատարելով վենեսուելական Excelsior թերթին։

Աղբյուրի փոխանցմամբ՝ դեպքը տեղի է ունեցել Վենեսուելաի հյուսիսային Վալենսիա քաղաքում։ Վեճի ժամանակ տղամարդը երկաթյա խողովակով հարվածել է 17-ամյա երիտասարդի գլխին և սպանել նրան։ Սպանելուց հետո հայրը և որդին փոս են փորել և այնտեղ թաքցրել սպանվածի ոսկորների մնացորդները։

«Մենք գիտենք, որ վեճը եղել է երկու դոլար պարտքի պատճառով, սակայն չգիտենք, թե ով ում էր պարտք», - ասել են սպանվածի հարազատները։

Սպանության և մարդակերության մեջ մեղադրվող հայրը և որդին ձերբակալված են։ Նրանք իրավապահներին ցույց են տվել այն վայրը, որտեղ թաղել են դիակի մնացորդները։