Սիրիայի հյուսիսում թուրք զինծառայող է զոհվել
Եվս մեկ թուրք զինծառայող է զոհվել Սիրիայի հյուսիսում, որտեղ թուրքական բանակն իրականցնում է «Ձիթենու ճյուղ» ռազմական գործողությունը։ Այս մասին գրում է ՏԱՍՍ-ը՝ հղում կատարելով Թուրքիայի Զինված ուժերի մամուլի ծառայության հաղորդագրությանը։
«Իդլիբում մեր հենակետերի վրա ահաբեկիչների կատարած հարձակման հետևանքով զոհվել է մեր զինծառայողներից մեկը, վիրավորվել՝ ևս հինգը․ տուժել է նաև մեկ քաղաքացիական անձ։ Ձեռքի տակ եղած միջոցներով անմիջապես արձագանքել ենք հարձակմանը և հակահարված տվել», - ասվում է թուրքական կողմի տարածած հաղորդագրության մեջ։
Հիշեցնենք, որ հունվարի 20-ին Թուրքիայի Զինված ուժերը սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։ Թուրքական բանակի կողմից գործողությանը մասնակցում է նաև «Սիրիական ազատ բանակ» կոչվող ընդդիմադիր զորաջոկատը։
Թուրքիայի նախագահ Ռեջեփ Թայիփ Էրդողանը հայտարարել է, որ թուրքական զորքն Աֆրինից կհեռանա «միայն վերջնական նպատակին հասնելուց հետո»։
Պաշտոնական Դամասկոսը դատապարտել է Թուրքիայի այս գործողությունը՝ այն համարելով ապօրինի ներխուժում այլ պետության տարածք։