Իսրայելի հատուկ ծառայությունները ոչնչացրել են երիտասարդ ռաբբիին սպանած պաղեստինցուն

Իսրայելի հատուկ ծառայությունները ոչնչացրել են մի պաղեստինցու, որը հունվարի 9-ին Հորդանան գետի արևմտյան ափին սպանել էր Հավաթ Գիլադ քաղաքի բնակիչ՝ 35-ամյա ռաբբի Րազիել Շեվահին։ Այս մասին իր ֆեյսբուքյան էջում գրել է Իսրայելի պաշտպանության նախարար Ավիգդոր Լիբերմանը։

«Փակեցինք մեր հաշիվները։ Շնորհավորում են մեր բանակին, ընդհանուր անվտանգության ծառայությանը (հակահետախուզություն) և ոստիկանության հատուկջոկատայիններին գործողությունը հաջողությամբ իրականացնելու համար։ Պարզ էր, որ դա միայն ժամանակի հարց է, մինչ մենք կհասնեինք ռաբբիի սպանության խմբավորման պարագլխին», - գրել է Լիբերմանը՝ հույս հայտնելով, որ կհաջողվի նաև հաշվեհարդար տեսնել իրենց հայրենակիցներին սպանած մյուս զինյալների հետ։

Ինչպես հայտնում է իսրայելական Kan լրատվականը, այսօր՝ փետրվարի 6-ին՝ վաղ առավոտյան, Հորդանան գետի արևմտյան ափին գտնվող Քֆար Յամուն գյուղում սպանվել է Ահմադ Ջարարը՝ ռաբբի Շեվահի սպանության կազմակերպիչը։

Հիշեցնենք, որ հունվարի 9-ին Նաբլուս քաղաքի մերձակա մայրուղում անհայտ անձը կրակ էր բացել իսրայելական համարանիշներով ավտոմեքենայի ուղղությամբ։ Կրակոցների հետևանքով զոհվել էր Հավաթ Գիլադ քաղաքի բնակիչ՝ 35-ամյա ռաբբի Րազիել Շեվահը։

Իսրայելի վարչապետ Բենիամին Նեթանյահուն խոստացել էր գտնել և պատժել հարձակումն իրականացնողին։