Սիրիական Աֆրինում թուրքական ռազմաօդային ուժերի ավիահարվածների հետևանքով զոհվել է ավելի քան 140 խաղաղ բնակիչ

Սիրիական Աֆրինում թուրքական ռազմաօդային ուժերի ավիահարվածների և հրետանակոծությունների հետևանքով խաղաղ բնակչության շրջանում գրացնված զոհերի թիվը հասել է 142-ի։ Այս մասին գրում է SANA գործակալությունը՝ հղում կատարելով քաղաքի հիվանդանոցներից ստացված տվյալներին։

Աղբյուրի փոխանցմամբ՝ բժշկական օգնություն է տրամադրվել 345 վիրավորների։ Հատկանշական է, որ զոհերի և տուժածների մեծ մասը կանայք և երեխաներ են։

Հաղորդվում է, որ փետրվարի 5-ին թուրքական կողմը հրետանակոծել է «Կարմիր մահիկի»՝ Սիրիայի Ռաժո բնակավայրում գտնվող գրասենյակը, որտեղից բնակիչները դեղորայք և անհրաժեշտ այլ պարագաներ էին ստանում։ Շենքին հասցվել էր նյութական վնաս, իսկ մարդկային զոհերի կամ վիրավորների մասին լուրեր դեռևս չեն հաղորդվում։

Հիշեցնենք, որ հունվարի 20-ին Թուրքիայի Զինված ուժերը սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։ Թուրքական բանակի կողմից գործողությանը մասնակցում է նաև «Սիրիական ազատ բանակ» կոչվող ընդդիմադիր զորաջոկատը։

Թուրքիայի նախագահ Ռեջեփ Թայիփ Էրդողանը հայտարարել է, որ թուրքական զորքն Աֆրինից կհեռանա «միայն վերջնական նպատակին հասնելուց հետո»։

Պաշտոնական Դամասկոսը դատապարտել է Թուրքիայի այս գործողությունը՝ այն համարելով ապօրինի ներխուժում այլ պետության տարածք։