Թիլերսոնը Ռուսաստանին մեղադրել է Սիրիայում քիմիական զենքի հարցով պարտավորությունները չկատարելու մեջ

ԱՄՆ պետքարտուղար Ռեքս Թիլերսոնը կարծում է, որ Ռուսաստանը չի կատարում Սիրիայում քիմիական զենքի ոչնչացման հարցով իր պարտավորությունները։ Թիլերսոնը նման կարծիք է հայտնել Fox News-ին տված հարցազրույցի ընթացքում։

«Նրանք աջակցում են Ասադի ռեժիմին։ Ռուսաստանը պատասխանատվություն է կրում, նրանք համաձայնել են միջոցներ ձեռնարկել Սիրիայում քիմիական զենքի հարցով, սակայն ակնհայտ է, որ նրանք չեն կատարել դա», - ասել է Պետքարտուղարը։

ԱՄՆ-ի արտաքին քաղաքական գերատեսչության ղեկավարը հանդես էլ եկել պնդմամբ, որ Ռուսաստանը «պետք է փոխի իր դիրքորոշումն այս հարցում»։

«Նրանք կարող են ժխտել ինչքան ուզում են, սակայն փաստը մնում է փաստ», - հավելել է Թիլերսոնը։

Հիշեցնենք, որ փետրվարի 5-ին ՄԱԿ-ի Անվտանգության խորհուրդը բաց նիստ էր անցկացրել Սիրիայում քիմիական զենքի կիրառման հարցով։ Մեծ Բրիտանիան, ԱՄՆ-ը և Ֆրանսիան ավանդական մեղադրանքներ են հնչեցրել Սիրիայի հասցեին։ ՄԱԿ-ում ՌԴ մշտական ներկայացուցիչ Վասիլի Նեբեզնյան Արևմուտքի ներկայացուցիչներին հիշեցրել է անմեղության կանխավարկածի մասին։ Նա նշել է նաև, որ Արևմուտքի երկրները չեն ցանկանում անկախ հետաքննություն անցկացնել Սիրիայում քիմիական զենքի կիրառման հարցով։