Մերձմոսկվայում վթարի է ենթարկվել ուղևորատար ինքնաթիռ․ ողջ մնացածներ չկան

Երեկ՝ փետրվաի 11-ին, արտակարգ դեպք է տեղի ունեցել Մերձմոսկվայում։ Մոսկվայից Օրսկ թռչող ԱՆ-148 ուղևորատար ինքնաթիռը վթարի է ենթարկվել Մոսկվայի «Դոմոդեդովո» օդանավակայանից թռիչքն սկսելուց րոպեներ անց։

ՏԱՍՍ-ի փոխանցմամբ՝  ինքնաթիռի անձնակազմի հետ կապն ընդհատվել է, իսկ ավելի ուշ ստացվել է ինքնաթիռի կործանման մասին լուրը։ Օդանավում եղել է 71 մարդ՝ 65 ուղևոր և անձնակազմի 6 անդամ։ Ոչ ոքի փրկվել չի հաջողվել։

Ռուսաստանի Դաշնության քննչական կոմիտեից հայտնում են, որ ինքնաթիռի անսարքության մասին հաղորդում չի ստացվել։

«Սարատովյան ավիաուղիների» ներկայացուցչի խոսքով՝ օդանավի անձնակազմի անդամները եղել են բավական փորձառու։

ԱՆ-148 ինքնաթիռն իր առաջին կանոնավոր թռիչքն իրականացրել է 2010 թ․։ 2011 թ․ օգոստոսին արդեն օդանավը գրանցել էր թռիչքի ռեկորդ՝ օդում գտնվելով 400 ժամ և 45 րոպե։

Հետաքննությունը դիտարկում է ավիավթարի մի քանի գործոն՝ եղանակային պայմանները, մարդկային գործոնը և օդանավի անսարքությունը։

Ավելի ուշ համացանցում է հայտնվել նաև ինքնաթիռի կործանման տեսանյութը, որը ներկայացնում ենք ստորև՝