ԱՆ-148 ինքնաթիռի կործանման հետևանքով զոհվածների հարազատներին կփոխհատուցվի մեկական միլիոն ռուբլի
Սարատովի իշխանությունները մեկական միլիոն ռուբլի (ավելի քան 17 հազար դոլար, - խմբ․) կփոխհատուցեն ԱՆ-148 ինքնաթիռի կործանման պատճառով զոհվածների ընտանիքներին։ Այս մասին Ռիա Նովոստի-ին հայտնել է Սարատովի նահանգապետարանի մամուլի ծառայության ղեկավար Նինա Պոպովան։
Նշվում է, որ այս որոշումը կայացրել է շրջանի ղեկավար Վալերի Ռադաևը։
Զոհերի հարազատներին նույնքան գումար կփոխհատուցեն նաև Օրենբուրգի և Լենինգրադի մարզային իշխանությունները։ Զոհերի հարազաներին գումար փոխանցելու համար բացվել է նաև բարեգործական հաշիվ։
Հիշեցնենք, որ երեկ՝ փետրվարի 11-ին, վթարի էր ենարվել «Սարատովյան ավիաուղիներ» ընկերությանը պատկանող ԱՆ-148 ուղևորատար ինքնաթիռը, որում եղել է 71 մարդ․ բոլորը զոհվել են։ Մոկվայից Օրսկ թռչող ինքնաթիռը կործանվել է «Դոմոդեդովո» օդանավակայանից թռիչքն սկսելուց րոպեներ անց։
Հետաքննությունը դիտարկում է ավիավթարի մի քանի պատճառ՝ եղանակային պայմանները, մարդկային գործոնը և օդանավի հնարավոր անսարքությունը։