Երուսաղեմում ամերիկյան նոր դեսպանատունը կբացվի առաջիկա մայիսին․ ԱՄՆ պետքարտուղարութուն
ԱՄՆ պետքարտուղարությունը հայտարարել է, որ Վաշինգտոնը պատրաստվում է Երուսաղեմում ամերիկյան նոր դեսպանատունը բացել առաջիկա մայիսին։ Այս մասին տեղեկացնում է CNN-ը։
ԱՄՆ-ի արտաքին քաղաքական գերատեսչության տարածած հաղորդագրության մեջ նշվում է, որ Երուսաղեմում ամերիկյան դեսպանատան բացումը պետք է համընկնի Իսրայելի հիմնադրման 70-ամյա տարեդարձի հետ։
Փետրվարի 23-ին Իսրայելի տրանսպորտի և հետախուզության նախարար Իսրայել Կացը նույնպես հայտարարել էր, որ Միացյալ Նահանգները ցանկանում է Երուսաղեմում նոր դեսպանատան բացման օրը համընկեցնել հրեական պետության ստեղծման 70-ամյակի հետ, որը նշվելու է առաջիկա մայիսի 14-ին։
Հիշեցնենք, որ ԱՄՆ նախագահ Դոնալդ Թրամփը նախորդ տարվա դեկտեմբերի 6-ին հայտարարել է, որ Երուսաղեմը ճանաչում է որպես Իսրայելի մայրաքաղաք, ինչպես նաև ցանկություն է հայտնել Թել Ավիվից այստեղ տեղափոխել ամերիկյան դեսպանատունը։
Դեկտեմբերի 18-ին ԱՄՆ-ը վետո էր դրել ՄԱԿ-ի Անվտանգության խորհրդի բանաձև վրա։ Վերջինս անօրինական էր համարում յուրաքանչյուր որոշում, որը ենթադրում է Երուսաղեմի կարգավիճակի փոփոխություն։ Բանաձևի տեքսում կոչ էր արվում բոլոր պետություններին հրաժարվել դիվանագիտական ներկայացուցչությունները Երուսաղեմ տեղափոխելու մտքից։ ԱՄՆ-ը ՄԱԿ-ի Անվտանգության խորհրդի 15 անդամներից միակն էր, որը դեմ քվեարկեց այս բանաձևին։
Իսրայելը Երուսաղեմն արևելյան թաղամասերով հանդերձ համարում է իր «միակ և անբաժան մայրաքաղաքը», որը գրավվել է 1967 թ․ Վեցօրյա պատերազմի (հայտնի նաև որպես Երրորդ արաբաիսրայելական պատերազմ անվանումով, - խմբ․) ընթացքում։
Երուսաղեմի կարգավիճակի հարցը մերձավորարևելյան այս հակամարտության կարևորագույն կողմն է, որը պետք է կարգավորվի պաղեստինցիների հետ բանակցությունների հիման վրա։