ԱՄՆ-ի գլխավորած կոալիցայի ավիահարվածների հետևանքով Դեր Զորի բնակավայրերում զոհվել է մոտ երեք տասնյակ խաղաղ բնակիչ

Փետրվարի 25-ին ԱՄՆ-ի գլխավորած միջազգային կոալիցիան ավիահարվածներ է հասցրել սիրիական Դեր Զոր նահանգի Էլ Շաաֆ և Զահրաթ Ալվանի բնակավայրերին։ Այս մասին գրում է ՏԱՍՍ-ը՝ հղում կատարելով սիրիական ՍԱՆԱ գործակալությանը։

Աղբյուրի փոխանցմամբ՝ ավիահարվածների հետևանքով նշված բնակավայրերում զոհվել է 29 խաղաղ բնակիչ, որի մեծ մասը՝ կին և երեխա։ Մարմնական վնասվածքներ են ստացել տասնյակ մարդիկ։

Ավելի վաղ՝ փետրվարի 22-ի գիշերը, ամերիկյան կոալիցիան գրոհել էր Հաջին քաղաքը, որ 50 կիլոմետր է հեռու Իրաքի հետ սահմանային Բու Քեմալ բնակավայրից։ Այս անգամ զոհվել էր 12 խաղաղ բնակիչ։

Սիրիայի կառավարությունը ՄԱԿ-ի Անվտանգության Խորհրդին բազմիցս կոչ է արել դատապարտել ԱՄՆ-ի գլխավորած կոալիցիայի ագրեսիվ գործողությունները, ինչի հետևանքով Սիրիայում զոհվում են բազմաթիվ խաղաղ մարդիկ։