Սիրիայում վթարի է ենթարկվել ռուսական ԱՆ-26 ուղևորատար ինքնաթիռը

Այսօր՝ մարտի 6-ին, Սիրիայում Հմեյմիմ օդանավակայանում վայրէջք կատարելու ժամանակ վթարի է ենթարկվել ռուսական Ան-26 ուղևորատար ինքնաթիռը։ Այս մասին գրում է ՏԱՍՍ-ը՝ հղում կատարելով ՌԴ պաշտպանության նախարարության հաղորդագրությանը։

Աղբյուրի փոխանցմամբ՝ ավիավթարի զոհ է դարձել 32 մարդ։

«Նախնական տվյալների համաձայն՝ ինքնաթիռում եղել է 26 ուղևոր և անձնակազմի 6 անդամ։ Բոլորը մահացել են», - ասվում է ՌԴ պաշտպանության նախարարության մամուլի ծառայության տարածած հաղորդագրության մեջ։

Պաշտպանական գերատեսչությունում նշում են, որ ինքնաթիռը վթարի է ընթարկվել Մոսկվայի ժամանակով 15:00-ին (Երևանի ժամանակով՝ 16:00-ին, - խմբ․)։ Ինքնաթիռը բախվել է գետնին թռիչքուղուց ընդամենը 500 մետր հեռավորության վրա։

Նախնական տվյալների համաձայն՝ վթարի պատճառ կարող էր լինել տեխնիկական անսարքությունը։ ՌԴ ՊՆ-ում նշում են, որ վթարից հետո ինքնաթիռում հրդեհ չի բռնկվել։