Չինաստանը պատասխան քայլեր կձեռնարկի ԱՄՆ-ի դեմ առևտրային պատերազմի դեպքում

ԱՄՆ-ի հետ առևտրային հնարավոր պատերազմի դեպքում Չինաստանը կձեռնարկի անհրաժեշտ պատասխան քայլեր։ Այս մասին հայտարարել է Չինաստանի արտաքին գործերի նախարար Վան Ին՝ հույս հայտնելով, որ Վաշինգտոնի հետ առկա հակասութունները հնարավոր կլինի լուծել կառուցողական երկխոսության միջոցով․ գրում է Ռիա Նովոստի-ն։

«Պատմությունը ցույց է տալիս, որ առևտրային պատերազմները երբեք չեն կարողացել խնդիրներ լուծել, այն էլ՝ ժամանակակից գլոբալիզացիայի պայմաններում, քանի որ արդյունքում կտուժի ոչ միայն այդ պատերազմը հրահրողը, այլև այն պետությունը, որի դեմ ուղղված է այդ պատերազմը։ Առևտրային պատերազմի դեպքում Պեկինը կձեռնարկի պատասխան քայլեր», - ամենամյա մամուլի ասուլիսի ժամանակ հայտարարել է ԱԳ նախարարը։

Վան Իի խոսքով՝ ԱՄՆ-ի և Չինաստանի շահերը՝ որպես աշխարհի առաջին և երկրորդ տնտեսությունների, խորապես փոխկապակցված են, և կողմերը պետք է հաշվի առնեն ոչ միայն իրենց ժողովուրդների շահերը, այլև ամբողջ աշխարհի բարեկեցությունը։

«Ամեն դեպքում հույս ունենք, որ մենք կնստենք սեղանի շուրջ և կունենանք կառուցողական երկխոսություն, ինչպես հավասար գործընկերներ՝ գտնելով մի լուծում, որը կբավարարի բոլորին», - ընդգծել է Չինաստանի արտաքին քաղաքական գերատեսչության ղեկավարը։